चैत १४, काभ्रे । काभ्रे जिल्लामा विभिन्न स्थानमा दुई सय ५३ बेडको क्वारेन्टाइन कक्ष स्थापना भएको छ । कोरोना भाइरसको संक्रमण रोकथामका लागि जिल्लामा नेपाली सेनाको सहयोगमा क्वारेन्टाइन स्थापना गरिएको हो ।
जिल्लाको सदरमुकाम धुलिखेलमा सबैभन्दा बढी क्षमता भएको क्वारेन्टाइन विष्णुदल गणमा नेपाली सेनाले स्थापना गरेको छ ।
नेपाली सेनाले गणको परिसरभित्रै एक सय बेड क्षमता भएको क्वारेन्टाइन स्थापना गरेको विष्णुदल गणका गणपति सुवास खड्काले जानकारी दिए ।
विष्णुदल गणले निर्माण गरेको उक्त क्वारेन्टाइनमा नेपाल रेडक्रस काभ्रेले क्वारेन्टाइनका लागि आवश्यक सामग्री सहयोग गरेको खड्काले जानकारी दिए ।
त्यसैगरी धुलिखेल नगरपालिका र नेपाली सेना विष्णुदल गणले धुलिखेलस्थित सञ्जीवनी उच्च माविमा ५० बेडको क्वारेन्टाइन तयार गरिएको छ ।
साथै बनेपा नगरपालिका, विष्णुदल गण र नेपाल रेडक्रस काभ्रेको संयुक्त पहलमा ६५ बेडको क्वारेन्टाइन निर्माण भएको बनेपा नगरपालिकाका प्रेस संयोजक लक्ष्मण तिमल्सिनाले जानकारी दिए । बेनपास्थित नेपाल रेडक्रस तालिम केन्द्रमा क्वारेन्टाइन निर्माण गरेको तिमल्सिनाले जानकारी दिए । बनेपा पोलिटेक्निक स्कुल र अन्य स्थानमा पनि क्वारेन्टाइन निर्माण भइरहेको उनले जानकारी दिए ।
त्यसैगरी नेपाली सेनाको सहयोगमा पाँचखाल नगरपालिकाले ३० बेड र नमोबुद्ध नगरपालिकाले आठ बेडको क्वारेन्टाइनको निर्माण गरिसकेका छन् ।
धुलिखेलमा हटलाइन नम्बर
धुलिखेल नगरपालिकाले आफ्नो नगरभित्रका नागरिकलाई अप्ठ्यारो परेमा सम्पर्क गर्ने निःशुल्क नम्बरको व्यवस्था गरेको छ ।
नगरवासीहरूलाई जुनसुकै अवस्थामा भए पनि जान्न–बुझ्नका लागि सहजै नगरपाकिलामा सम्पर्क गर्न सकून् भनेर हटलाइन नम्बरको व्यवस्था गरेको नगरपालिकाका प्रमुख अशोक व्याञ्जुले बताए ।
नगरपालिकाको हटलाइन नम्बर १६६०११४९३२९ रहेको छ ।
त्यसरी नै जिल्लामा विभिन्न अस्पतालले २३ बेडको आइसोलेसन कक्ष पनि तयार गरेका छन् ।
धुलिखेल अस्पतालले आठ बेडको, शिर मेमोरियल अस्पतालले पाँच बेडको, मेथिन्कोट अस्पतालले पाँच बेडको र पाँचखाल स्वास्थ्य चौकीले पाँच बेड क्षमताको आइसोलेसन कक्ष तयार पारेका हुन् ।
प्रतिक्रिया दिनुहोस