पनौतीमा संक्रमितका परिवारको सदस्यमा संक्रमण नभएकाे पुष्टि, पाँचखालका दुई जनाकाे पनि रिपाेर्ट नगेटिभ

जेेेठ २५, काभ्रे । काभ्रेको पनौती नगरपालिका वडा नम्बर ८ का कोरोना संक्रमित महिलाका परिवारका कुनै पनि सदस्यमा कोरोना संक्रमण नभएको पाइएको छ । धुलिखेल अस्पतालको कोरोना परीक्षण प्रयोगशालामा संक्रमित ३९ बर्षिया महिलाका श्रीमान, सासु, ससुरा, दुई छोरी र एक छोराको पीसीआर विधि मार्फत कोरोना परीक्षण गरिएको थियो ।

६ जनाकै रिपोर्ट नेगेटिभ आएको स्वास्थ्य कार्यालय काभ्रेका प्रमुख डा. नरेन्द्रकुमार झाले पुष्टि गरे । संक्रमित परिवारका सदस्यहरुको शनिबार स्वाब संकलन गरेर धुलिखेल अस्पताल ल्याइएको थियो ।

यस्तै, डाक्टर झाका अनुसार पाँचखालका संक्रमितसँगै क्वारेन्टाइनमा बसेका अन्य दुई जनाको पनि पीसीआर रिपोर्ट नेगेटिभ आएको छ । संक्रमितका परिवारलाई भने क्वारेन्टाइनमा राखिएको छ।

धुलिखेलको प्रयोगशालामा गरिएको परीक्षणमा शुक्रबार काभ्रे जिल्लाका ५ जनामा कोरोना संक्रमण देखिएको थियो । रोशी गाउँपालिकाका ३ जना, पनौती र पाँचखाल नगरपालिकाका १/१ जनामा कोरोना देखिएको हो । संक्रमितहरुको भक्तपुर स्थित कोरोना अस्पतालमा उपचार भइरहेको छ ।

गाउँघरमै खेती पाती गर्ने पनौतीका महिलामा कोरोना संक्रमण देखिएपछि कहाँबाट कोरोना फैलियो भन्ने पत्ता लगाउन कन्ट्याक भइरहेको छ ।