बनेपा / त्रिभुवन विश्वविद्यालय ग्रामीण विकास केन्द्रीय विभाग किर्तिपुर काठमाडौँबाट सेवानिवृत्त प्राध्यापक डा. प्रेम शर्माको जीवनीमा आधारित ’एक जीवन तीन मिसन’ शीर्षकको कैलाश मानसरोवर यात्रा समेटिएको आत्मपरक वृत्तचित्र सार्वजनिक गरिएको छ ।
शर्मा नै निर्माता रहेको उक्त वृत्तचित्रको लेखन एंव निर्देशन उप–प्राध्यापक डा. राजन विनायक पासाले गरेका हुन् । उत्सव बज्राचार्यको संगीत, प्रशान्त श्रेस्ठको सम्पादन रहेको सो वृतचित्रमा अम्बिका प्रधान र दुर्गाराज पाण्डेको स्वराकंन रहेको छ ।
काठमाडौंको नेपाल पर्यटन तथा होटल व्यवस्थापन प्रतिष्ठानमा आयोजित कार्यक्रममा काठमाडौं विश्वविद्यालय शिक्षा शास्त्र संकायका डिन प्राध्यापक डा. बालचन्द्र लुइंटेलले सार्वजनिक गरे । उनले प्रेम शर्माको जीवनबाट धेरै प्रेरणा लिन सकिने भन्दै वृत्तचित्र एउटा महत्वपूर्ण विधा भएको र यसलाई धेरैले हेर्ने र धेरै ठाउँमा पुग्ने धारणा राखे ।
वृत्तचित्रका निर्देशक उप–प्राध्यापक डा.राजन विनायक पासाले प्रेम शर्माको जीवन प्रेरणदायी र सङ्घर्षपूर्ण रहेकोले जीवनीमा आधारित आत्मपरक वृत्तचित्र निर्माण गरेर नयाँ कार्य थालनी गरेको बताए ।
त्रिभुवन विश्वविद्यालय नेपाली विभागका सह–प्राध्यापक नेत्र न्यौपानेले हिन्दु धर्म र हिन्दु सभ्यतालाई कैलाश मानसरोवरले चिनाएको चर्चा गर्देै चार धर्मको पावनस्थल रहेको मानसरोवर वृत्तचित्रमा दृश्यचित्र र शब्दचित्रको संयोजन आकर्षक रहेको बताए ।
त्रि.वि. ग्रामीण विकास केन्द्रीय विभागका विभागीय प्रमुख सह–प्राध्यापक डा. सुमन खरेलले प्राध्यापक डा. शर्माको व्यक्तित्वबाट आफु प्रभावित भएको विचार राख्दै पीडामा पनि हाँस्न सक्ने र हरेकलाई दिशाबोध गर्न सक्ने प्रेम शर्मा एक अथक यात्री रहेको तथा सिद्धान्तलाई व्यवहारमा उपयोग गर्न सक्नु नै सही शिक्षा भएको धारणा व्यक्त गरे ।
वरिष्ठ बाल आँखा रोग विशेषज्ञ प्रा. डा.सविना श्रेष्ठले प्रेम शर्माको व्यक्तित्वबाट प्रभावित भएको भन्दै कैलाश मानसरोवरको धार्मिक महत्वमाथि चर्चा गरिन् ।
प्राध्यापक डा. शर्माले जीवनमा आफुले देखे भोगेका घटनाहरुलाई समेटेर वृत्तचित्र बनाई गुरुदक्षिणा प्रदान गरेकोमा वृत्तचित्र निर्माता निर्देशक आफ्ना विद्यार्थीलाई धन्यवाद दिए । नेपाल सम्भावना र अथाह ज्ञानले भरिएको देश हो भन्दै भावी पुस्तालाई नयाँ सिर्जना र व्यावहारिक शिक्षामा लाग्न आग्रह गरे ।
प्रतिक्रिया दिनुहोस