पनौतीमा सामुदायिक स्वास्थ्य स्वयंसेविकालाई तालिम

नौलो समाचार संवाददाता
२०८२ अषाढ १९, बिहिबार मा प्रकाशित १३३ पटक पढिएको
पनौतीमा सामुदायिक स्वास्थ्य स्वयंसेविकालाई तालिम

पनौती / जनस्वास्थ्य कार्यालय काभ्रेपलाञ्चोकले पनौती नगरपालिकाका राष्ट्रिय महिला सामुदायिक स्वास्थ्य स्वयंसेविकालाई तालिम दिएको छ ।

असार १६ गतेबाट सुरु भएको ४ दिनको पुनर्ताजगी तालिममा २० जना महिला स्वास्थ्य स्वयंसेविका सहभागी छन् ।

पनौती नगरपालिका स्वास्थ्य शाखाका प्रमुख रहेका जनस्वास्थ्य अधिकृत जनक के.सी. दिनमान गुर्मछान, पुरुषोत्तम तिमल्सिना, दीक्षा थापा, अनिलराज ढुंगेल लगायतले सहजीकरण गरेका थिए ।

कार्यक्रम संयोजक पद्मराज कैनीका अनुसार, जिल्लाको पनौती, बनेपा, नमोबुद्धमा पुनर्ताजगी र आधारभूत तालिम र मण्डनदेउपुर नगरपालिका साथै भुम्लु गाउँपालिकाकाका महिला स्वास्थ्य स्वयंसेविकालाई आधारभूत तालिम सञ्चालन गरिएको छ । ६२ जनाले आधारभूत र ५७ जनाले पुनर्ताजगी तालिम लिएको उनले जानकारी दिए ।

समापन समारोह प्रमाणपत्र वितरण गर्दै कार्यक्रम संयोजक कैनीले २०४५ सालदेखि सुरु भएको महिला सामुदायिक स्वास्थ्य स्वयंसेविका कार्यक्रमले मातृ शिशु स्वास्थ्य तथा बाल स्वास्थ्य लगायतको क्षेत्रमा महत्वपूर्ण योगदान दिएको बताए ।

पनौती स्वास्थ्य शाखा प्रमुख जनक केसीले स्वास्थ्य सम्बन्धी निर्देशिका र मापदण्डहरू समयसमयमा फेरिने भएकाले यस्ता पुनर्ताजगी तालिम प्रभावकारी हुने धारणा राखे ।

राष्ट्रिय महिला सामुदायिक स्वास्थ्य स्वयंसेविका रिता तामाङले आफूले जानेका ज्ञान र सीपहरू अध्यावधिक गर्न पाउँदा तालिम प्रभावकारी बनेको बताइन् ।

प्रतिक्रिया दिनुहोस