धुलिखेल / हिमालयन युनिभर्सिटी कन्सोर्टियम (हिमाली विश्वविद्यालय सञ्जाल)को सचिवालय धुलिखेलस्थित काठमाडौं विश्वविद्यालय (केयू) परिसरमा स्थापना गरिएको छ ।
इन्टरनेसनल सेन्टर फर इन्टिग्रेटेड माउन्टेन डेभलपमेन्ट (इसिमोड) मा रहँदै आएको सचिवालय संस्थाले औपचारिक रूपमा काठमाडौं विश्वविद्यालयलाई हस्तान्तरण गरेको हो ।
इसिमोडको मुख्यालयमा आयोजित एक समारोेहमा सम्झौता पत्रमा हस्ताक्षर गर्दै हस्तान्तरण गर्ने सम्झौता भएको थियाे । इसिमोडले बुधबार डिसेम्बर काठमाडौं विश्वविद्यालयलाई सचिवालय हस्तान्तरण गर्ने घोषणा गरेको हो ।
हिमाली विश्वविद्यालय कन्सोर्टियम सन् २००७ मा स्थापना गरिएको विश्वविद्यालयको सञ्जाल हो, जसले हिन्दुकुश–हिमालय क्षेत्रभित्रका विश्वविद्यालयहरू बीचको सहकार्यलाई सघन बनाउँदै विकासका साझा चुनौती कम गर्ने गर्छ । यसको मुख्य उद्देश्य विशेषतः पहाडी क्षेत्रमा देखिने समस्या समाधान गर्न ज्ञान आदान–प्रदानको प्लेटफर्म बनाउनु थियो ।
इसिमोड र यसको मुख्य दातृ निकायको सहयोगमा हिमाली विश्वविद्यालय कन्सोर्टियमले विश्वविद्यालय तथा ज्ञान–विनिमय संस्थाहरूलाई जोड्दै विशेषज्ञ, विद्यार्थी तथा अन्य सिकाइ समुदायलाई एउटै प्लेटफर्ममा जोडेको छ । हाल हिमाली विश्वविद्यालय कन्सोर्टियम हिन्दुकुश–हिमालयभित्र तथा बाहिर रहेका १०० भन्दा बढी विश्वविद्यालय तथा शैक्षिक संस्थाहरूको सञ्जालमा परिणत भइसकेको छ ।
हिमाली विश्वविद्यालय कन्सोर्टियमको सचिवालय काठमाडौं विश्वविद्यालयमा सर्ने निर्णयले कन्सोर्टियमको पूर्वनिर्धारित लक्ष्यअनुरुप कन्सोर्टियमलाई स्वतन्त्र बनाउनुका साथै स्थानीय मर्म र प्राज्ञिक छविमा ऊर्जा थप्ने काम गरेको छ ।
इसिमोडका महानिर्देशक पेमा ग्याम्छोले हिमाली विश्वविद्यालय सञ्जालको सचिवालय काठमाडौं विश्वविद्यालयलाई हस्तान्तरण गरेर इसिमोड जिम्मेवारीबाट नभागेको भन्दै निरन्तर सहयोग गर्ने प्रतिवद्धता जनाए ।
काठमाडौं विश्वविद्यालयका उपकुलपति प्राध्यापक डा. अच्युत वाग्लेले हिन्दुकुश–हिमालय क्षेत्रका विश्वविद्यालयहरूबीचको शैक्षिक सहकार्यमा यो नयाँ कोशेढुंगा हुने बताए । काठमाडौं विश्वविद्यालय क्षेत्र तथा क्षेत्रबाहिरका उच्च शिक्षण संस्थाहरूसँगको आफ्नो सहकार्यलाई अझ उपयोगी दिशामा अघि बढाउन तयार रहेको भन्दै उनले विश्व तापक्रम वृद्धि र चरम मौसमीय घटनाहरू बढिरहेका बेला हिन्दुकुश–हिमालय क्षेत्रका शैक्षिक संस्थाहरूले विश्वासनीय डेटा र अनुसन्धान विकसित गर्ने जिम्मेवारी थप बोक्नुपर्ने बताए ।
प्रतिक्रिया दिनुहोस