निलो आकाशको स्थापना दिवसमा दाप्चा माविका विद्यार्थीलाई न्यानो कपडा

दाप्चा / काठमाडौंस्थित तिनकुने, गैह्रीगाउँमा रहेको निलो आकाश बचत तथा ऋण सहकारी संस्थाले स्थापना दिवसमा दाप्चा माध्यमिक विद्यालयका बालबालिकालाई न्यानो कपडा (स्वेटर) र स्टेशनरी सामाग्री वितरण गरेको छ ।

१९ औं स्थापना दिवसको अवसरमा मंगलबार विद्यालयमा नै आएर बालबालिकालाई ती सामाग्री हस्तान्तरण गरिएको हो ।

नमोबुद्ध नगरपालिका प्रमुख कुनसाङ लामाले सहयोगी दाताप्रति आभार प्रकट गरे । उनले सबैको साथले नै सामुदायिक विद्यालयले राम्रो गर्न सक्ने भन्दै शिक्षा सुधार गर्न शिक्षक, विद्यार्थी, अभिभावक, जनप्रतिनिधि लगायत सरोकारवाला सबै लागिपर्नु पर्ने बताए ।

सहकारी संस्थाका अध्यक्ष गणेशप्रसाद अधिकारीले आफ्नो ठाउँको विद्यालयको लागि सहयोग गर्न पाउँदा खुशी लागेको बताए ।

विद्यालय व्यवस्थापन समितिका अध्यक्ष रामेश्वर अधिकारी, शिक्षक अभिभावक संघका अध्यक्ष मनोजप्रसाद अधिकारी, प्रधानाध्यापक लोकेन्द्र सिं घटाल लगायतले विद्यालयलाई प्राप्त सहयोग प्रति आभार प्रकट गर्दै यसले विद्यार्थीहरू र विद्यालयको शैक्षिक गुणस्तर सुधार हुने अपेक्षा गरे ।

कार्यक्रममा नमोबुद्ध नगरपालिका वडा नं ८ का वडा सदस्य राममणी हुमागाईँ, मन्दिरा अधिकारी, सुन्तली सार्की, विद्यालय व्यवस्थापन समितिका सदस्य तारा मगर, सहकारी संस्थाका सञ्चालक समिति, निवर्तमान अध्यक्ष, संस्थापक अध्यक्षलगायतको उपस्थिती थियो ।

विद्यालयले सहकारी संस्थालाई प्रशंसा–पत्र प्रदान गरेको छ ।