धुलिखेल / क्यान्सर रोगसंग जुधिरहेका २ जनाले १ हजार ८ सय किलोमिटर साइकल यात्रा गर्दा धुलिखेल अस्पतालले सम्मान गरेको छ ।
क्यान्सर रोगसंग जुधिरहेका हर्क लामा र कविता चित्रकारले मध्यपहाडी लोकमार्गको चिवाभन्ज्याङ्गबाट झुलाघाटसम्म साइकल यात्रा गरेका थिए । क्यान्सर संक्रमण भएका र उनका आफन्तले उपचारका लागि रकम अभाव झेल्न नपरोस् भनेर उपचार कोष स्थापना गर्न साइकल यात्रा गरिएको थियो ।
साइकल यात्री हर्क लामा र कविता चित्रकारले अनुभव सुनाउँदै क्यान्सर जित्न सक्ने साहस मिलेको बताए ।
अस्पतालका संस्थापक एवं कार्यकारी निर्देशक डा.रामकण्ठ माकजुले क्यान्सर संक्रमण भएर त्यसलाई जित्न सक्ने साहसका साथ साइकल यात्रा गर्ने दुबै जनाको प्रशंसा गरे ।
एक महिना सञ्चालन गरिएको साइकल यात्राका क्रममा विभिन्न स्थानमा सहभागी डा.सुमनराज ताम्राकारले यात्राका अनुसार, सोही क्रममा १५ स्थानमा २ हजार भन्दा बढीलाई क्यान्सर सम्वन्धिको सचेतना फैलाउन सकिएको बताए ।
डा.विकास पराजुलीले यात्राका विभिन्न अनुभव सुनाए ।
कार्यक्रममा अस्पतालका प्रशासकीय निर्देशक डा.विराजमान कर्माचार्यले साइकल यात्रा बाट प्राप्त जति नै रकम अस्पतालले थपेर कोष स्थापनामा सहयोग गर्ने बताए ।
डा. तारालाल श्रेष्ठले कोष संकलनबारे जानकारी दिए । साइकल कल्चर कम्युनिटीबाट संकलित रकम हर्क लामा, कविता चित्रकार, डा. तारालाल श्रेष्ठ र ज्ञानेन्द्र स्थापितबाट धुलिखेल अस्पताललाई हस्तान्तरण गरियो ।
साइकल यात्रामा सहयोग गर्ने र सहभागीलाई कार्यक्रममा सम्मान गरियो ।
प्रतिक्रिया दिनुहोस