सिन्धुपाल्चोकमा विभिन्न ठाउँमा बाढी, दुईको मृत्यु, ११ बेपता, १४ घर बगे

असार २५, सिन्धुपाल्चोक । सिन्धुपाल्चोकमा भोटेकोशी र याल्मो नदीमा आएको बाढीले बगाउँदा दुईजनाको मृत्यु भएको छ ।

बाह्रबिसे ५ जम्बुका दुई जनाको शव भेटिएको छ भने ११ जना बेपता भएका छन् । जम्बुमा केही घर बगाएको स्थानीयले जानकारी दिएका छन् ।

सिन्धुपाल्चोकको बाह्रबिसे नगरपालिका ५, जम्बुमा पहिरो गई १४ घर बगाउँदा दुई जनाको मृत्यु भएको छ भने ९ जना वेपत्ता छन् ।

पहिरोमा परेका उनीहरु भोटेकोशी नदीमा वेपत्ता भएका हुन् । भोटेकोशी नदीले अरनिको राजमार्गको जुरे क्षेत्र र बाह्रबिसे क्षेत्रमा सडक पूर्णरुपमा कटान गर्दा सो क्षेत्रसँग सम्बन्धसमेत विच्छेद भएको छ ।

घटनामा घाईते ३ जनाको उद्दारको लागि हेलिकप्टर ल्याउने तयारी भइरहेको छ।

शव फेला परेकामा जम्बुका २० वर्षीय निकेश बस्नेत र उनकी तीन वर्षीया छोरी रहेको स्थानीयले जानकारी दिएका छन् । अझै नौ जना बेपत्ता छन् ।

लगातार तीनदिनसम्म देशभर ठूलो पानी पर्ने चेतावनी गृह मन्त्रालयले दिएकै बेला जम्बुमा पहिरोले विनाश गरेको हो। जम्बु बाह्रबिसे बजारबाट करीब ३ किलोमिटर माथि पर्दछ।

बाढीले एक स्कर्पियो, एक ट्रक र एक पानी बोक्ने ट्याक्कर बगाएको जिल्ला प्रहरी कार्यालयका डीएसपी माधव प्रसाद काफ्लेले जानकारी दिए ।

उनका अनुसार बाह्रबिसे नगरपालिका भन्दा माथि खागदल पुल बगाएको छ । पुल बगाउँदा बाह्रविसेमाथि र तलको सम्पर्क टुटेको हाे।

मध्य भोटेकोशीको निर्माण स्थल पनि बाढीका कारण ध्वस्त भएको छ ।

यसैगरी जुरे पहिरो अगाडि लगभग सय मिटर सडक पनि खोलाले कटान गरेको छ । थप विवरण आउन बाँकी रहेकाेे छ।

#सिन्धुपाल्चोक