नमोबुद्ध / नमोबुद्ध नगरपालिका वडा नम्बर ९ का जनप्रतिनिधि रहेका कांग्रेस वडा सभापति कान्छामान तामाङमाथि भएको आक्रमणको नेपाली कांग्रेसले भत्सर्ना गरेको छ ।
नेपाली कांग्रेस जिल्ला कार्यसमिति काभ्रे, प्रतिनिधी सभा क्षेत्रीय कार्यसमिति, प्रदेश कार्यसमिति, नगर र वडा कार्यसमितिले विज्ञप्ति जारी गरेर दोषीमाथि कारबाही माग गरेका हुन् ।
नेकपा माओवादी केन्द्र नमोबुद्ध नगर कमिटीका सचिव एक्सन भनिने पूर्णमान लामाले वडा नम्बर ९ का सदस्य रहेका कान्छामान तामाङलाई वैशाख १३ गते मरासन्न हुनेगरी कुटपिट गरेका थिए ।विकास निर्माणसँग सम्बन्धित सामान्य विवादमा उनले सो वडाका जनप्रतिनिधि रहेका कान्छामानलाई हेल्मेट र मुक्का प्रहार गरी घाइते बनाएका थिए । टाउको, घाँटी र शरीरका विभिन्न भागमा चोट रहेका उनी अझै अचेत रहेको कान्छामानको उपचार थापाथली स्थित नर्भिक अस्पतालमा भइरहेको छ ।
जिल्ला सभापति तीर्थ लामाले हस्ताक्षर गरेको विज्ञप्तिमा सामाजिक रुपमा निन्दनीय र कानुनी रुपमा दण्डनीय कार्य भएकाले दोषी उपर हदैसम्मको कारबाही माग गरिएको छ ।
प्रतिनिधी सभा क्षेत्र नम्बर १ का सभापति दिनेश लामाले जारी गरेको विज्ञप्तिमा जनप्रतिनिधिमाथि सांघातिक आक्रमण गर्ने जो कोहीलाई तत्काल कडाभन्दा कडा कारबाही गर्न सम्बन्धित प्रशासनको ध्यानाकर्षण गरिएको छ ।
प्रदेश सभा क्षेत्रीय कार्यसमिति क्षेत्र नम्बर १ (ख) का सभापति चन्द्रबहादुर लामाले जारी गरिएको विज्ञप्तिमा उक्त निन्दनीय र अपराधिक घटनाबाट देश र समाजको शान्ति, अमनचयनमा खलल पु¥याउने, सामाजिक सद्भाव भड्काउने र व्यक्तिको शान्तिपूर्वक बाँच्न पाउने अधिकार बाट वञ्चित हुने र समाज जहिले पनि भयभित, त्रसित हुने भएकाले उक्त घटनामा संलग्न व्यक्तिलाई छानबिन गरी कडाभन्दा कडा कारबाहीको माग गरिएको छ ।
नमोबुद्ध नगर कार्यसमितिका सभापति कुनसाङ लामाले जारी गरेको विज्ञप्तिमा यस्ता अपराधिक क्रियाकलापमा संलग्न कुनै पनि व्यक्ति वा समूहलाई उन्मुक्ति दिएको खण्डमा पार्टी लोकतान्त्रिक संघर्षमा उत्रन बाध्य हुने उल्लेख छ ।
नेपाली कांग्रेस नमोबुद्ध वडा नम्बर ९ कार्यसमितिले जारी गरेको विज्ञप्तिमा घटनामा संलग्न जोसुकै भएतापनि निष्पक्ष, छिटो र प्रभावकारी अनुसन्धान गरी दोषीलाई कानुन बमोजिम कडा कारबाही गर्न माग गरिएको छ ।
नेपाली कांग्रेसको भातृ संगठन नेपाल तरुण दल, नेपाल आदिवासी जनजाति महासंघले पनि विज्ञप्ति जारी गर्दै घाइते सभापति कान्छामान तामाङको स्वास्थ्य लाभको कामनासहित दोषी उपर कारबाही माग गरेका छन् ।
यता, नेपाल कम्युनिस्ट पार्टी (माओवादी केन्द्र) को जिल्ला, नगर र वडा कमिटीले पनि विज्ञप्ति जारी गर्दै घटनालाई अनावश्यक ‘राजनीतिक रङ’ दिन खोजिएको भन्दै बचाउ गरेको छ ।
जिल्ला संयोजक भोला अर्याल, नगर अध्यक्ष रामकृष्ण उपाध्याय र वडा कमिटी अध्यक्ष प्रेमबहादुर लामाले जारी गरेको विज्ञप्तिमा ‘दुवै पक्षको उपस्थितिमा छलफलबाट यी र यस्ता घटना फेरि नदोहोरिने गरी सर्वपक्षीय भेलाबाट घटनालाई उचित निकास दिन’ माग गरिएको छ ।
प्रतिक्रिया दिनुहोस