बिहीबारदेखि सार्वजनिक यातायात सञ्चालन हुने

सबै बस जाेरबिजाेर प्रणालीमा चल्ने
नौलो समाचार संवाददाता
२०७७ श्रावण ५, सोमबार मा प्रकाशित २५५ पटक पढिएको
बिहीबारदेखि सार्वजनिक यातायात सञ्चालन हुने

साउन ५, काठमाडौं। लकडाउन खुकुलो गर्दै जिल्लाभित्र सार्वजनिक यातायात सञ्चालन गर्न सरकारले अनुमति दिए पनि अस्वीकार गर्दै आएका व्यवसायीहरू अन्ततः सार्वजनिक यातायात सञ्चालन गर्न सहमत भएका छन् ।

सोमबार यातायात व्यवस्था विभाग, यातायात व्यवसायी राष्ट्रिय महासंघ महानगरी ट्राफिक प्रहरी महाशाखालगायत यातायात मजदूर संगठनहरूबीच भएको छलफलपछि साउन ८ गते बिहीबारदेखि सार्वजनिक यातायात सञ्चालन गर्ने सहमति भएको हो ।

सहमति अनुसार यातायात व्यवसायीले सरकारद्वारा तोकिएको स्वास्थ्यसम्बन्धी सबै शर्तहरू पूरा गरी सार्वजनिक यातायात सञ्चालन गर्ने छन् । यातायात श्रमिकका लागि आवश्यक स्वास्थ्य सामग्रीहरू मास्क, स्यानिटाइजर, पन्जा, पीपीई सम्बन्धित व्यवसायीले नै उपलब्ध गराउने छन् ।

त्यस्तै सार्वजनिक यातायात सञ्चालनका लागि मजदुरहरुको कोरोना बीमा गरिने भएको छ । त्यसका लागि ५० प्रतिशत प्रिमियम सरकारले ब्यहोर्ने तथा ५० प्रतिशत व्यवसायीले ब्यहोर्ने भएका छन् ।

यातायात सञ्चालका क्रममा कोरोना संक्रमणका कारण यातायात मजदुरको मृत्यु भएमा उसलाई क्षतिपूर्ति प्रदान गर्न कोष खडा गर्ने र त्यसका लागि विभागले मन्त्रालयसमक्ष सिफारिस गर्ने सहमति पनि भएको छ ।

यातायात व्यवस्था विभाग, महानगरीय ट्राफिक प्रहरी महाशाखा, यातायात व्यवसायी राष्ट्रिय महासंघ, नेपाल यातायात स्वतन्त्र मजदुर संगठन, अखिल नेपाल यातायात मजदुर संघ र नेपाल यातायात मजदुर संघबीच भएको वार्तामा सरकारको निर्णयअनुसार सार्वजनिक सवारीसाधन जोर गतेका दिन जोर नम्बर र बिजोर गतेका दिन बिजोर नम्बरका मात्रै सञ्चालन हुने छन् ।

यातायत व्यवसायीहरू उठाउँदै आएका कर्जाको किस्तालगायतका माग नेपाल राष्ट्र बैंकले मौद्रिक नीतिमा सम्बोधन गरेपछि व्यवसायीहरू दबाबमा परेका थिए ।

प्रतिक्रिया दिनुहोस


error: Content is protected !!