धुलिखेल / जिल्ला प्रशासन कार्यालय काभ्रेपलाञ्चोकले सञ्चारकर्मीमार्फत आर्थिक बर्ष २०८१/८२ को बार्षिक प्रगति प्रतिवेदन सार्वजनिक गरेको छ ।
बिहिबार जिल्ला समन्वय समितिको हलमा कार्यक्रम आयोजना गरेर प्रशासनले चालु आर्थिक बर्षमा भएका कृयाकलापका साथै शान्ती सुरक्षा र विपद व्यवस्थापनमा भएका गतिविधीबारे जानकारी गराएको हो ।
सूचना अधिकारी समेत रहेका सहायक प्रमुख जिल्ला अधिकारी सुदर्शन श्रेष्ठले नागरिकता, राष्ट्रिय परिचयपत्र, राहदानी, नावालक परिचयपत्र, मुद्दा, संघ संस्था तथा हतियार, दलित, जनजाति परिचयपत्र, अनुगमन, निरिक्षण, राहत वितरण, राजस्व र खर्च विवरणबारे प्रस्तुत गरेका थिए ।उनका अनुसार, नयाँ नागरिकता ९ हजार २ सय ५९ वटा, प्रतिलिपि नागरिकता ९ हजार ८ सय ४५ जनालाई जारी भएको छ भने ७१ जनाले परित्याग गरेका छन् । ६७ जनालाई गैह्र आवासीय नागरिकता प्रदान गरिएको छ भने १० वटा नागरिकता रद्ध र २ जनालाई अंगिकृत नागरिकता प्रदान गरिएको छ । राष्ट्रिय परिचयपत्रका लागि २७ हजार १ सय ९६ आवेदन विवरण जिल्ला प्रशासन कार्यालयमा दर्ता भएका छन् भने १४ हजार ७ सय ४८ परिचय पत्र कार्ड वितरण गरिएको छ । दर्ता भएका ७४ मुद्दामध्ये ४१ फछ्र्यौट भएका छन् भने ३ सय ४३ ठाडो उजुरी मध्ये ३ सय ३१ फछ्र्यौट भएका छन् ।
प्रमुख जिल्ला अधिकारी उमेशप्रसाद ढकालले विपद अति प्रभावित जिल्ला काभ्रेपलाञ्चोकमा विपद प्रतिकार्य योजनाका साथै जोखिम न्युनिकरणको लागि बैठक, छलफल, समन्वय र तयारी तिव्र पारिएको बताए ।गत असोज १० देखि १२ गतेसम्मको अविरल बर्षापछिको बाढी र पहिरोमा घर क्षतिग्रस्त भएकाहरुलाई अस्थायी आवास निर्माणको लागि दिइएको रकम र निकासा रकमबारे प्रमुख जिल्ला अधिकारी ढकालले जानकारी दिए । बाढी र पहिरोले क्षतिग्रस्त वी.पी. राजमार्गमा बाढी, पहिरो र लेदोको कारण सवारी साधन सञ्चालन गर्दा हुन सक्ने जोखिम मध्यनजर गर्दै साँझ ५ बजेसम्म मात्रै सञ्चालन गर्न दिने प्रस्ताव गरिएको र सिन्धुली जिल्लासंग समन्वय गरेपछि निर्णयमा पुगिने प्रजिअ ढकालले बताए ।
नेपाल पत्रकार महासंघ काभ्रे शाखाका अध्यक्ष विनोद न्यौपानेले बजार अनुगमन फितलो भएको भन्दै प्रभावकारी बनाउन सुझाव दिए ।
प्रतिक्रिया दिनुहोस