चैत ३, काभ्रे । काभ्रे जिल्लामा आज ६५ वर्ष माथिका ४० जना जेष्ठ नागरिकलाई कोरोना विरुद्धको खोप लगाइएको जिल्ला स्वास्थ्य कार्यालय काभ्रेले जनाएको छ । कार्यालयका अनुसार चौरीदेउराली गाउँपालिकाका १४ जना महिला र २६ जना पुरुष गरी ४० जना जेष्ठ नागरिकलाई कोरोना विरुद्धको खोप लगाइएको हो ।
हालसम्म जिल्लाका १४ हजार ८ सय ४१ जना जेष्ठ नागरिकलाई कोरोना विरुद्धको खोप लगाइएको जिल्ला स्वास्थ्य कार्यालयका काभ्रेका प्रमुख डा. नरेन्द्रकुमार झाले जानकारी दिए । उनका अनुसार दोस्रो चरणको कोरोना विरुद्धको खोप कार्यक्रममा जिल्लाका १३ स्थानीय तहका ६५ वर्ष माथिका ७ हजार ४ सय ९७ जना महिला र ७ हजार ३ सय ४४ जना पुरुषलाई कोरोना विरुद्धको खोप लगाइएको हो ।
३ जना कोरोना संक्रमणमुक्त
त्यस्तै जिल्लामा आज ३ जना कोरोना संक्रमितको उपचारपछि कोरोना संक्रमणमुक्त भएको कार्यालयको जानकारी छ । ३ जना संक्रमणमुक्त भएसँगै काभ्रेमा अहिले ४ जना महिला र १० जना पुरुष गरी १४ जना सक्रिय कोरोना संक्रमित रहेको कार्यालयका प्रमुख डा. झाले बताए । उनका अनुसार काभ्रेमा कोरोना संक्रमितको संख्या ३३ सय ७० पुगेको छ ।
प्रतिक्रिया दिनुहोस