धुलिखेल/ प्रधानमन्त्री केपी शर्मा ओलीले विकास र परिवर्तनका लागि आफूहरुको लगातारको प्रयासले नेपालमा केही हुन्छ र हुँदैछ भन्ने आशा देखिएको बताएका छन्।
काभ्रेपलञ्चोकको धुलिखेल नगरपालिका वडा नं ६ स्थित धुलिखेल अस्पतालको ‘ट्रमा एण्ड इमर्जेन्सी सेन्टर’को आज शिलान्यास गर्दै उनले केही नभएको ठाउँमा पनि विकास र परिवर्तन देखिनुुले स्थानीय जनतामा आत्मविश्वास पलाएको बताए ।
केही भएन भनेर गलत भाष्य सिर्जना गर्नेहरुले भएको विकास नदेखेको टिप्पणी गर्दै कुनै पनि अवस्थामा परिवर्तन ल्याउन एकैदिनमा सम्भव नहुने भएकाले यसका लागि इमानदार र लगातारको प्रयास आवश्यक रहेको बताए। `अविकासबाट विकासमा मुलुकलाई लान सबैले आफ्नो ठाउँबाट योगदान गर्नुपर्छ । कुरा काट्नेहरु त गल्ली गल्लीमा भेटिन्छन् । काम गर्न र साँच्चिकै परिवर्तन ल्याउन कुरा काटेजस्तो सजिलो हुँदैन’ प्रधानमन्त्री ओलीले भने, `तीस वर्षअघि बाँझो कान्ला र खेत भएको यस ठाउँमा आधुनिक अस्पताल बन्छ र विकास हुन्छ भनेर सपना देख्नेहरुले यो काम अघि बढाए । त्यो सम्भव छ भन्ने विश्वास गरेर स्थानीय जनताले आफ्नो खेतबारी दिएर योगदान गरे । अस्पताल र काठमाडौँ विश्वविद्यालयको सहकार्य टुुट्न दिनुहुँदैन । यस सहकार्यमा सरकारले पनि सक्दो साथ दिनेछ ।’
प्रधानमन्त्री ओलीले सरकारले निरोगी नेपालको उद्देश्य राखेर गरिरहेको काममा धुलिखेल अस्पतालले सहज र गुणस्तरीय सेवा दिएर आफ्नो ठाउँबाट योगदान दिने विश्वास पनि व्यक्त गरे।
कार्यक्रममा स्वास्थ्य तथा जनसङ्ख्या मन्त्री प्रदिप पौडेलले आगामी आर्थिक बर्षको नीति तथा कार्यक्रममा स्वास्थ्यको क्षेत्रलाई प्राथमिकता दिएको बताए। उनले सरकारी तवरबाट मात्रै स्वास्थ्य सेवा प्रदान गर्न सम्भव नभएको बताउँदै सरकारले सामुदायिक क्षेत्रबाट स्वास्थ्य सेवा दिने अस्पताललाई अनुदान दिने गरि आगामी बर्षको कार्यक्रममा समाबेश गरिएको बताए ।बीमालाई एकद्वार नीति अनुसार संचालन गर्ने बताए ।
प्रतिक्रिया दिनुहोस