विद्यालयमा नै पब्जी प्रतियोगिता

बनेपा\ बनेपा–८ स्थित बागमती अंग्रेजी बोर्डिङ स्कुलले विद्यालयमा अनलाइन खेल पब्जी प्रतियोगिता गरेको छ । खेलकुद सप्ताह अन्तर्गत अन्तर सदन (हाउस) पब्जी प्रतियोगिता गरिएको प्रिन्सिपल दिपेन्द्र विष्टले जानकारी दिए ।

उक्त खेलले बालबालिकाको मानसिक रूपमा सक्रियता जगाउने बिष्टले बताए । पब्जी खेलप्रती अभिभावकको नकारात्मक दृष्टिकोणलाई चिर्नको लागि पनि यो प्रतियोगिताको आयोजना गरेको उनको तर्क छ । जिल्लामा नै पहिलो पटक प्रतियोगिता आयोजना गरिएको विद्यालयको दाबी छ ।

प्रतियोगितामा चार सदन मध्ये हरियो सदन पहिलो स्थान हासिल गर्न सफल भएको छ । पहेलो सदन दोस्रो र नीलो सदन तेस्रो भएको छ । प्रतियोगिताको लागि रोजन मुस्याजु, रोनिश मुस्याजु र मनिश मानन्धरको समूहले प्राविधिक सहयोग गरेका थिए ।

विद्यालयले प्रत्येक बर्ष आन्तरिक रुपमा खेलकुद सप्ताह गर्दै आएको छ ।