नमोबुद्ध / स्थानीयको सहभागितामा निर्मित उपभोक्ता समितिमार्फत निर्माण गर्दा काम धेरै र गुणस्तरीय हुन सक्छ भन्ने उदाहरण नमोबुद्ध–७, काक्रेँमा देखिएको छ ।
प्रदेश सरकारले नमोबुद्ध नगरपालिकालाई हस्तान्तरण गरेको २५ लाख रकमको शसर्त योजनाको लागि गठन भएको उपभोक्ता समितिले लागत स्टमेट भन्दा थप काम गरेकोे हो ।
स्टमेटमा ३ सय मिटर सडक स्तरोन्नती, ड्रेन निर्माण सहितको काम गर्नुपर्नेमा उपभोक्ता समितिले थप ८० मिटरमा सोही काम गरेको छ । ‘आफ्नो ठाउँमा भएको काम गुणस्तरीय गर्नुपर्छ भनेर मन लगाएर गर्यौ र गुणस्तरीय काम भएको छ,’ काँक्रे अर्याल गाउँ खानेपानी पहुँचमार्ग निर्माण उपभोक्ता समितिका अध्यक्ष रोशन अर्यालले भने, ‘श्रोतको उचित सदुपयोग गर्दा स्टमेट भन्दा थप काम पनि भएको छ ।’ उनले उक्त बजेटबाट गाउँको विचसम्म मात्रै सडक पुगेकोले पुरा गर्नको लागि बजेट विनियोजन गर्न अनुगमनको लागि पुगेका बाग्मती प्रदेशका खानेपानी, उर्जा तथा सिंचाई मन्त्री तीर्थ लामालाई अनुरोध गरे ।
नमोबुद्ध वडा नं ७ का सदस्य श्यामगोपाल श्रेष्ठले आफ्ना चुनावी प्रतिवद्धता पुरा गर्न निर्वाचनपछि पुन घरदैलोमा आएकोमा र बजेट विनियोजन गरेकोमा मन्त्री लामालाई आभार प्रकट गरे । ‘चुनाव जितेर गएपछि सांसदहरु फर्किएर आएको थाहा थिएन, जनताको पिरमर्का बुझ्न आउनुभएकोमा र बजेट समेत बिनियोजन गरिदिनुभएकोमा आधार प्रकट गर्दछु ।’ श्रेष्ठले भने । श्रेष्ठले सडक कालोपत्रे, सामुदायिक भवन, मन्दिर, सिंचाई, मुहान संरक्षण लगायतका काम गर्न बाँकी रहेको भन्दै मन्त्री लामाको ध्यानाकर्षण गराए ।
मन्त्री लामाले दाप्चाबाट काँक्रे हुँदै चौकीडाँडा जोड्ने सडक, दाप्चा–पिपलटार हुँदै साझकोट सडक, खाक्सी सडक कालोपत्रे आफ्नो प्राथमिकतामा रहेको भन्दै उनले आफ्नो कार्यकालमा ती सबै सडक कालोपत्रे गर्ने प्रतिवद्धता जनाए । उनले त्यहाँबाट माग भएका सबै योजना आगामी बजेटमा समावेश गर्ने प्रतिवद्धता समेत जनाए । भकुण्डेवेशी खानेपानीको लागि ४ करोड विनियोजित गरेर टेण्डर समेत भइसकेको भन्दै उनले ठूला खाले योजना कार्यान्वयन गराउने बताए ।
प्रतिक्रिया दिनुहोस