बनेपा / नेकपा एमालेबाट अलग्गिएर गठन भएको नेपाल कम्युनिष्ट पार्टी (एकिकृत समाजवादी) काभ्रेको १० औं जिल्ला अधिवेशन चैत्र ३ र ४ गते बनेपामा हुने भएको छ ।
२०७८ भदौ २ गते निर्वाचन आयोगमा विधिवत दर्ता भएको नेकपा (एकिकृत समाजवादी)ले एमाले पुनर्गठन भएको भन्दै १० औं जिल्ला अधिवेशन भएको जनाएको छ ।
पत्रकार सम्मेलन गर्दै नेकपा (एकिकृत समाजवादी) ले दिएको जानकारी अनुसार पार्टी अध्यक्ष तथा पूर्वप्रधानमन्त्री माधवकुमार नेपालले उद्घाटन गर्ने अधिवेशनको लागि वडा, नगर गाउँ तथा जनवर्गिय संगठनहरुबाट ४ सय ७६ जना प्रतिनिधिहरु सहभागी हुने जनाएको छ ।
जिल्ला इञ्जार्ज टोकबहादुर वाइवा र जिल्ला अधिवेशन आयोजक समितिका संयोजक बसुन्धरा हुमागाईले हस्ताक्षर गरेको विज्ञप्तिमा साढे दुई वर्षमा ३ हजार ९ सय ६६ संगठित पार्टी सदस्य, १३ वटै स्थानीय तह र १ सय १७ वडामा कमिटी र २२ वटा जनवर्गीय संगठन विस्तार भएको उल्लेख छ ।
अधिवेशनबाट निर्माण हुने ५५ देखि ६१ सदस्यीय जिल्ला कमिटीमा ४० वर्षमुनि उमेर समूहका कम्तीमा २० प्रतिशत, ३३ प्रतिशत महिला, उत्पीडित दलित समुदाय, अल्पसंख्यक तथा अति सीमान्तकृत समुदाय र अपांगता भएका व्यक्तिको समेत प्रतिनिधित्व सुनिश्चित गरिएको नेकपा (एकिकृत समाजवादी) ले जनाएको छ ।
पार्टी विद्रोह पश्चात गरिएका पार्टी कामको समीक्षाका साथै पार्टीमा देखिएका समस्याको समाधान र वर्तमान राजनीतिक परिस्थितिको ठोस विश्लेषणको आधारमा आगामी कार्ययोजना तय गने जिल्ला अधिवेशन आयोजक समितिका संयोजक हुमागाईले जानकारी दिए ।
प्रतिक्रिया दिनुहोस