अरनिको राजमार्ग सहित काभ्रेका विभिन्न स्थानमा सडक अवरुद्ध, केही स्थानमा एकतर्फी खुलाइयो

नौलो समाचार संवाददाता
२०८१ अषाढ २२, शनिबार मा प्रकाशित ५५ पटक पढिएको
अरनिको राजमार्ग सहित काभ्रेका विभिन्न स्थानमा सडक अवरुद्ध, केही स्थानमा एकतर्फी खुलाइयो

बनेपा / शुक्रबार रातिदेखि परेको अविरल वर्षाका कारण अरनिको राजमार्ग र वि.पि राजमार्गको विभिन्न स्थानमा सडक अवरुद्ध भएको छ ।

जिल्ला प्रहरी कार्यालय काभ्रेका प्रवक्ता रहेका प्रहरी नायव उपरीक्षक (डिएसपि) राजकुमार श्रेष्ठका अनुसार, अरनिको राजमार्गको धुलिखेल-खावा सडक खण्ड अन्तर्गत तिरतिरे धारा नजिक पहिरोसहित रूख ढलेर सडक अवरुद्ध भएकोमा प्रहरीले स्थानीयको सहयोगमा बाटो एकतर्फी खुलाइएको छ ।

यता, अविरल बर्षापछिको बाढी र पहिरोको कारण वी.पी राजमार्गका विभिन्न स्थानमा अवरोध भएकोमा स्थानीयको सहयोगमा सेना, प्रहरीले हटाउन प्रयास गरिरहेको छ ।

रोशी गाउँपालिकाको वडा नम्बर ८ नार्के, चारसय बेसी, वडा नम्बर ९ मंगलटारको मंगल जनविजय माध्यामिक विद्यालय अगाडि, वडा नम्बर ११ कालढुङगा र वडा नम्बर १२ माम्तीमा खहरेखोलाबाट लेदो आएर सडक अवरुद्ध भएको छ । रोशी गाउँपालिका वडा नम्बर ७, लासकोटस्थित अवरुद्ध सडक स्काभेटर र जेसिभीको सहायताले एकतर्फी खुलाइएको छ ।

बेथानचोक गाउँपालिका र खानीखोला गाउँपालिका जोडिएका खोपासी-चलाल-ढुङ्गखर्क- च्याम्राङबेशि-सुकुमफेदी-फापरवारि सडकको ग्वाभञ्ज्याङ खण्ड र पार्थली खण्ड अवरुद्ध भएको छ । खुलाउन प्रयास जारी छ ।

अन्य ग्रामिण सडक समेत अवरोध भएकोले सावधानी अपनाउन पनि प्रहरीले अनुरोध गरेको छ ।

प्रतिक्रिया दिनुहोस