धुलिखेलमा सस तथा चाउमिन बनाउने कारखानामा आगलागी

धुलिखेल / धुलिखेल नगरपालिका वडा नं २ मा सस तथा चाउमिन बनाउने कारखानामा आगलागी भएर पूर्ण क्षति भएको छ ।

वडा नं २ थिङ्ग गाउँमा दोलखाको तामाकोशी गाउँपालिका वडा नं १ घर भएका शम्भु कार्कीले सञ्चालन गरेको कारखानामा विहान अन्दाजी ५ः३० बजे आगलागी हुँदा फलामको ट्रस्ट र जस्ताले बनेको टहरासहित सम्पूर्ण सामान क्षति भएको जिल्ला प्रहरी कार्यालय काभ्रेका प्रवक्ता समेत रहेका प्रहरी नायव उपरिक्षक (डिएसपी) राजकुमार श्रेष्ठले जानकारी दिए ।

उनका अनुसार, तयारी अवस्थामा रहेको सस, चाउमिनका साथै कच्चा पदार्थ र ती सामाग्री बनाउने मेसिन समेत जलेर पूर्ण नष्ट भएको छ । कारखानामा नै पार्किङ गरिराखेको बा ३९ प. १७९७ नंवरको मोटरसाइकल समेत क्षति भएको प्रहरीले जनाएको छ ।

कारखाना बन्द गरी कोही नभएको अवस्थामा आगलागी भएकोले कारण पत्ता नलागेको र क्षतिको विवरण आउन बाँकी रहेको प्रहरीले जनाएको छ ।