धुलिखेल / काठमाडौ विश्वविद्यालयको ९८ औं सभा बैठकले विश्वविद्यालयको नयाँ उपकुलपतिका लागि मेडिकल संकायमा कार्यरत वरिष्ठ शिक्षकहरुले समेत दरखास्त हाल्न पाउने गरी कार्यविधि पुनःविचार गर्न खोज तथा सिफारिस समितिलाई निर्देशन दिएको छ ।
उपकुलपतिको आवेदनका लागि आव्हान भएको सूचनामा आफूहरुलाई आवेदन गर्नबाट वञ्चित गराइएको भनी मेडिकल संकायका शिक्षकहरुले कुलपति एवं प्रधानमन्त्री ओलीसमक्ष निवेदन दिएको विषयमा छलफलपछि बैठकले कार्यविधि पुनःविचार गर्न निर्देशन दिएको हो ।
दुई/दुई कार्यकाल उपकुलपति भइसकेका व्यक्तिसमेत आवेदन दिन नपाउने तथा हरेक कार्यकालका लागि कार्यविधि संशोधन भइरहने स्थितिप्रति बैठकमा ध्यानाकर्षण गराइएको हो ।
पूर्व उपकुलपति प्रा डा सुरेशराज शर्माको संयोजकत्वमा रहेको सिफारिस समितिले प्रकाशन गरेको सूचनाका आधारमा प्राप्त १७ मध्ये १६ दरखास्त स्वीकृत भइसकेको थियो ।
उपकुलपतिको लागि बनाएको मापदण्डमा असन्तुष्टी जनाउँदै मेडिकल संकायतर्फकाले सर्वोच्च अदालतमा रिट हाले पनि दावी नपुग्ने भन्दै खारेज भएको थियो । पूर्व उपकुलपति डा. सुरेशराज शर्मा नेतृत्वको उपकुलपति छनोट समितिले बनाएको कार्यविधि नै नमिल्ने भन्दै खारेजीको माग राखेर चिकित्सकहरु सर्वोच्च अदालत गएका थिए । मेडिकलका एमडी, एमएस र एमडीएसले पनि आवेदन दिन पाउनु पर्ने माग चिकित्सकहरुको छ ।
केयूका उपकुलपति भोला थापाको चार बर्षको कार्यकाल माघ ६ गतेबाट सकिँदैछ ।
प्रतिक्रिया दिनुहोस