बनेपा / त्रिभुवन विश्वविद्यालय अन्तर्गत रहेका काभ्रेपलाञ्चोक जिल्लाका १४ वटा क्याम्पसमा चैत्र ५ गते हुने भनिएको स्वतन्त्र विद्यार्थी युनियन (स्ववियु)निर्वाचनको लागि विद्यार्थी संगठनहरुले सोमबार ‘संगठन’ दर्ता गरेका छन् ।
प्रमुख राजनीतिक दल निकट विद्यार्थी संगठनहरु नेपाल विद्यार्थी संघ (नेविसंघ), अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) र अखिल नेपाल राष्ट्रिय स्वतन्त्र विद्यार्थी युनियन क्रान्तिकारी (अनेरास्वियु क्रान्तिकारी) लगायतका विद्यार्थी संगठनले कार्यतालिका अनुरुप सोमबार संगठन दर्ता गरेका हुन् ।
स्ववियु निर्वाचनको लागि बनेपाको चैतन्य बहुमुखी क्याम्पस, धुलिखेलको सन्जिवनी र धुलिखेल क्याम्पस, पनौतीको तेजगंगा, ईन्द्रेश्वर क्याम्पस र कुशादेवि क्याम्पस ,नमोबुद्धको जनक, दाप्चा कृष्ण बहुमुखी क्याम्पस, रोशीको मंगल जनविजय क्याम्पस, पाँचखालको सर्वमङ्गला बहुमुखी क्याम्पस, भुम्लुको प्रकाश बहुमुखी क्याम्पस, चौरीदेउरालीको प्रभा बहुमुखी क्याम्पस र बेथाचोकको पार्वती बहुमुखी क्याम्पसमा संगठन दर्ता भएका छन् ।
निर्वाचन कार्यतालिका अनुसार, फागुन २१ गते मतदाता सूची प्रकाशित गर्ने र २५ गते मतदाता सूची उपर दाबी विरोध, सोही दिन नै मतदाता सूची उपर दाबी विरोधको छानबिन गरी अन्तिम नामावली प्रकाशित गर्ने कार्यतालिका छ ।
फागुन २६ उम्मेदवारका लागि मनोनयनपत्र वितरण हुनेछ । प्रत्यक्ष र समानुपातिक दुवै तर्फको उम्मेदवारको मनोनयन पत्र नामावली दाखिला गर्ने समय फागुन २७ का लागि तोकिएको छ । सोही दिन नै दुवै तर्फको उम्मेदवारको नामावली प्रकाशित गर्ने कार्यतालिका छ । फागुन २८ गते दुवै तर्फको उम्मेदवारको नामावली उपर दाबी विरोध गर्ने र सोही दिन नै दुवै तर्फको दाबी विरोध उपर छानबिन गरी उम्मेदवारको नामावली प्रकाशित गर्ने कार्यतालिका छ ।
दुवै तर्फको उम्मेदवारको नाम फिर्ता लिने अन्तिम समय फागुन २९ गते तोकिएको छ । २९ गते नै उम्मेदवारको अन्तिम नामावली सार्वजनिक गरिनेछ । चैत ५ गते विहान ८ बजेदेखि दिनको ४ बजेसम्म मतदान हुनेछ ।
संगठन दर्ता गरेपनि नेपाल विद्यार्थी संघ काभ्रेपलाञ्चोकका सभापति अञ्जनराज खतिवडाले उत्साहपूर्ण तयारीमा लागेको प्रतिकृया दिए ।
प्रतिक्रिया दिनुहोस