पोल्ट्री संघले कुखुराको मासुको थोक मूल्य बढायो, उपभोक्तालाई अब किलोको ३३० रुपैयाँ पर्ने

जेठ २१, काठमाडौं । आपूर्ति कम हुन थालेपछि पोल्ट्री संघले कुखुराको तयारी मासुको मूल्य बढाएको छ । संघले मासुको मूल्य किलोमा १० रुपैयाँले वृद्धि गरेको बताएको छ ।

यससँगै थोक मूल्य ३१० देखि ३१५ रुपैयाँ प्रतिकिलो पुगेको छ भने उपभोक्ता मूल्य ३३० रुपैयाँको हाराहारीमा हुने संघको भनाइ छ । साथै जिउँदो कुखुराको मूल्य पनि २२० रुपैयाँबाट बढेर २५० रुपैयाँ पुगेको संघले जानकारी दिएको छ ।

कुकुराजन्य उत्पादनको मूल्य उकालो लाग्नुको मूल कारण झन्डै साढे दुई महिनादेखि जारी लकडाउन भएको पोल्ट्री व्यवसायीहरुले बताएका छन् ।

लकडाउनको अवधि लम्बिँदै जाने हो भने बजारमा कुखुराको मासु र अण्डाको मूल्य अझ बढ्दै जाने नेपाल पोल्ट्री व्यवसायी महासंघका अध्यक्ष गुण चन्द्र बिष्टले बताए ।  लकडाउनका कारण ह्याचरी तथा कुखुरापालन व्यवसायमा गम्भीर असर परेको उनको भनाइ छ ।

सामान्यतया माग तथा खपत बढेको अवस्थामा मूल्य बढ्ने भए पनि अहिले कुखुराको मासुको मूल्य बढ्नुको कारण लगभग उल्टोजस्तै रहेको देखिन्छ ।

पोल्ट्री संघका अध्यक्ष जंगबहादुर बिसी भन्छन्, ‘लकडाउनका कारण बजार बन्द हुँदा मासु बिक्री घटेपछि मासुको मूल्य उकालो लाग्न थालेको हो, उपभोक्ताबाट माग र खपत बढेर होइन ।’

बिक्री नै कम हुँदै गएपछि अधिकांश कुकुरापालक किसानहरुले अहिले आफ्ना पोल्ट्री फर्ममा नयाँ कुखुरा हाल्न छोडेको बिसीको भनाइ छ । यसकारण पनि पछिल्लो समय कुखुराको उत्पादन र आपूर्तिमा कमी आउँदा यसको चाप बजार मूल्यमा परेको हो ।

‘लकडाउनको प्रभावले मासु पसलहरु केही समय मात्र खुल्ने भएकोले खपत कम भएको छ । यसबाट माग र बिक्री न्यून हुँदा उत्पादन पनि निकै कम भइसकेको छ,’ बिसीले भने ।

लकडाउनको सुरुआती दिनमा माग स्वाट्ट घट्दा अर्कोतर्फ उत्पादन बढी हुँदा मूल्य घटेको थियो । तर अहिले भने उपत्यकाको तुलनामा कुखुरा उत्पादनको हब तराई र चितवनमा कुखराको मूल्य अझ बढेको छ । बजार ओरालो लागेपछि जोखिम मोलेर किसानहरुले उत्पादन गरेका छैनन् । अहिले सामान्य अवस्थामा तयारी मासुको मूल्य २ सय ५० देखि ३ सय रुपैयाँबीच हुनुपर्ने बिष्टको भनाइ छ । तर, यस्तै भइरहने हो भने अर्को महिना कुखुराकै मासुको मूल्य किलोको पाँच सय रुपैयाँ पुग्ने उनी बताउँछन् ।

‘लकडाउनको समयमा जोखिम मोलेर कुखुरा पालिरहेका बाहेक अन्य संघ र किसानले तत्काल कुखुरा तथा अन्डा उत्पादन गर्न सक्दैनन्, पालिएका कुखुरा सकिँदै गएका छन् । नयाँ उत्पादन बजारमा आउन पनि समय लाग्छ,’ बिष्टले भने । कोरोनाको प्रभावले कुखुरा व्यवसाय संटकमा परेकाले पोल्ट्री व्यवसायले दैनिक करोडौं घाटा व्योहोर्दै आएको उनले बताए ।

करीब दुई महिनादेखि नै कुखुराको उत्पादन घट्दै गएको छ । उचित मूल्य नपाउँदा व्यवसायीहरुले केही महिनाअघि उत्पादित चल्लाहरु नष्ट गरेका थिए । लकडाउन लागु भएपछि नै पालेका चल्ला र कुखुरा समेत जिउँदै गाडिएकाले बजारमा अभाव हुने अवस्था आउन सक्ने व्यवसायीहरुले बताएका छन् ।