फागुन १५, काभ्रे। बनेपा नगरपालिका वडा नम्बर १४ आशापुरीस्थित आशापुरीरोडा ढुंगा सप्लायर्समा सुक्खा पहिरो खस्दा एक जनाको मृत्यु भएको छ।
सुक्खा पहिरोमा पुरिएर रामेछापको दोरम्बा सैलुङ गाउँपालिका वडा नम्बर ४ घर भई हाल भक्तपुर ठिमी बस्ने टिपर चालक आन्दाजी ३२ बर्षीय श्याम मगर मृत्यु भएको हो।
आज ढुंगा लोड गर्ने क्रममा माथिबाट सुख्खा पहिरो खस्दा प्रदेश ३-०२-००३ क ५७४८ नम्बरको टिपर सहित श्याम पहिरोमा पुरिएका थिए।
पहिरोमा २ वटा स्काभेटर, ३ वटा टिपर, १ निशान गाडी पुरेको थियो ।
घाईते हुनेमा काभ्रेको बनेपा नगरपालिका वडा नम्बर १४ आशापुरीका २९ बर्षीय सिन्दमन तामाङ रहेका छन् । स्काभेटर चालक तामाङको छाती र टाउकोमा चोट लागेको छ। उनको अबस्था भने मध्यम रहेको छ ।
त्यस्तै अर्का घाइते खोटाङको खोटाङ गाउँपालिका वडा नम्बर २ भई हाल बनेपा नगरपालिका वडा नम्बर १४ आशापुरीका २२ बर्षीय रमेश सार्को रहेका छन् । उनि स्काभेटरका सह-चालक हुन्। उनको टाउको र खुट्टामा चोट लागेको छ । दुबै घाईतेको अवस्था मध्यम रहेको प्रहरीले जनाएको छ ।
घाइतेहरूको मध्यपुर ठिमीमा उपचार भइरहेको छ ।
काभ्रे र भक्तपुरको सीमा रहेको खानीमा दुवैतर्फका जनप्रतिनिधीको लगानी भएकोले पहुँचका आधारमा अवैध खानी सञ्चालनमा आएको स्थानीयको गुनासो छ । आशापुरी खोला नजिकै जोडिएको खानीले धुलो समेत खोला नजिकै थुपारेकोले बाढीको जोखिम भएको स्थानीय बताउँछन् ।
घटनापछि स्थलगत पुग्नुभएकी प्रमुख जिल्ला अधिकारी हुमकला पाण्डेले जोखिम अझै रहेकाले प्राविधिक अध्ययन बिना केही समय उत्खनन् नगर्न निर्देशन दिनुभएको छ।
प्रतिक्रिया दिनुहोस