फर्जी पूर्जा बनाइ बनेपामा हुदै नभएको जग्गा ५५ लाखमा बिक्री, मालपोत कर्मचारीको मिलेमतोमा ७ वटा यस्तै जग्गा पास

नौलो समाचार संवाददाता
२०७९ श्रावण ५, बिहिबार मा प्रकाशित २०९० पटक पढिएको
फर्जी पूर्जा बनाइ बनेपामा हुदै नभएको जग्गा ५५ लाखमा बिक्री, मालपोत कर्मचारीको मिलेमतोमा ७ वटा यस्तै जग्गा पास

साउन ५, काभ्रे। फर्जी लालपूर्जा बनाइ नक्कली जग्गा बिक्री गरेको खुलासा भएको छ। जिल्ला प्रहरी कार्यालयले अर्काको जग्गा देखाएर नक्कली पूर्जा बनाइ बिक्री गरेको आरोपमा केही व्यक्तिलाई पक्राउ गर्दै थप अनुसन्धान गरिरहेको छ।

हुँदै नभएको जग्गा खरिद गर्नेमध्ये ४ जनाले प्रहरी कार्यालयमा गरेको उजुरीका आधारमा अनुसन्धान गर्ने क्रममा जिल्ला मालपोत कार्यालयका कर्मचारीसहित केही व्यक्तिलाई पक्राउ गरेको छ। हाल पक्राउ पर्नेमा धादिङको जीवनपुर–५ घर भई काभ्रेको बनेपा नगरपालिका–९ बस्ने रविप्रसाद रेग्मी, मालपोतका कर्मचारी रामविनय यादव र सतिश भण्डारी छन्। यादव र भण्डारीले नक्कली जग्गा बिक्री गर्ने गिरोहसँगको मिलेमतो रहेको प्रहरीले जनाएको छ।

नक्सादेखि पूर्जासमेत सबै सक्कलीजस्तै बनाइ देखाएका रेग्मीले अरुको जग्गालाई प्लटिङको कागजमा कित्ता देखाएर मालपोत कार्यालयले हाल साविक गरिदिएको ७६ कित्ता बनाएको प्रारम्भिक अनुसन्धानमा देखिएको प्रहरीले जनाएको छ। साथै रेग्मीले प्रारम्भिक बयानका क्रममा ७ वटा यस्तै प्रकृतिका जग्गा पास गरिसकेको बताएका छन् भने ७६ कित्ता जग्गा यही साउन ८ गते पास गरिसक्ने गरी व्यक्तिसँग बैना रकम लिएको स्विकारेका छन्।

मालपोतको रेकर्डमा उक्त जग्गामध्ये केही कित्ता व्यक्तिका नाममा देखिएको भए पनि नक्सा अनुसार सबै नक्कली भएको प्रहरीले जनाएको छ। दश वर्षदेखि बनेपामा बसोबास गर्दै आएका रेग्मीले काभ्रेको साविक कोलाँती भुम्लु–७ निवासी निर्मला उप्रेतीलाई बनेपा नगरपालिका साविक १ नं वडाको आठ आना जग्गा ५५ लाखमा बिक्री गरेका थिए। उनले नक्कली जग्गाको लालपूर्जा बनाएर बनेपा–१ ठेगाना तथा कित्ता नं १५०४ मा आठ आना जग्गा राखेर उप्रेतीलाई देखाएका थिए।

उक्त जग्गा गत असार ३० गते मालपोत कार्यालयबाट पास भएको हो। रेग्मीले निर्मलालाई असार ३१ गते जग्गा पास भएको पूर्जा दिएका थिए। सोमबार पूर्जामा निर्मलाको नक्कली ल्याप्चे देखेपछि जिल्ला प्रहरी कार्यालयमार्फत मालपोतमा जग्गाको कित्ता नं भिडाउँदा जग्गा नै नभएको पुष्टी भएको हो। तत्कालै उपे्रतीको उजुरीका आधारमा प्रहरीले रविलगायत मालपोतका कम्प्युटर अधिकृत भण्डारी र रजिस्ट्रेसन फाँटमा कार्यरत कर्मचारी यादवलाई मङ्गलबार पक्राउ गरी गरी अनुसन्धान थालेको छ।

जग्गा पास गर्न भू–सेवा केन्द्रमार्फत लेखापढी गर्ने पनौती ९ का सीता थापा र उनका श्रीमान् राजन थापा भने फरार रहेको जनाइएको छ। पीडितका अनुसार नक्कली जग्गा बिक्री गर्ने गिरोहका नाइके रेग्मीले बनेपा–५ घोकेचौरस्थित खोला नजिकैको प्लटिङको जग्गा देखाएका थिए
घटना विवरणअनुसार रेग्मीले पूर्जा मात्रै नक्कली बनाएनन्, वडा कार्यालयको चार किल्ला सिफारिस, जग्गाको नक्सा नक्कली बनाइ जग्गासमेत नक्कली देखाएका थिए। प्रहरीका अनुसार राम्रो स्थानको धेरै जग्गा कम मूल्यमा पाएपछि उप्रेती खरिद गर्न राजी भएको देखिन्छ। हाल साविक नभएको जग्गा पास नहुने भएपछि रेग्मीले बनेपाको जग्गा बिक्री गर्न मालपोत कार्यालयका केही कर्मचारी र लेखापढी व्यवसायीसँग मिलेमतो गरेका थिए। मालपोत कार्यालयले भने हाल अनलाइनमार्फत जग्गा पास गराउँदै आएको छ।

हुँदै नभएको जग्गाको पूर्जा र सिफारिस बनाएर रेग्मीले उप्रेतीलाई गत असार ३० गते ५५ लाखमा जग्गा बिक्री गराइ पास गराएको अनुसन्धानबाट खेुलेको हो। सोही जग्गाको अफलाइन लिखत तयार गर्न लेखापढी व्यवसायी सीता थापा र उनका पति राजन थापा सहभागी भएका हुन्।

अनलाइन नभएको जग्गाको लिखत लगेर डिजिटल फोटो खिचाउन मालपोतका कम्प्युटर अपरेटर भण्डारीले कार्यालयको सिस्टममा फोटो नलिइ बाहिर खिचाइ निर्मलालाई ल्याप्चे लगाउन लगाएका थिए। अर्का कर्मचारी यादवले उप्रेती र रेग्मी दुवै पक्षलाई जग्गा किनबेचको लेनदेन सकार्न लगाएका थिए।

त्यसअघि थापा दम्पत्तीले नक्कली लिखतअनुसार रजिस्टे«सन नम्बर १३०४९ ‘ख’, पारित मिति २०७९ असार ३१ गते, टोकन दर्ता नम्बर १३०४, रजिस्टे«सन दस्तुर रु एक लाख ५१ हजार ८७६, पुँजीगत लाभकर रु तीन लाख, रसिद नंम्बर १४४४ राखेर पेश गरेका थिए।
जग्गा पासका सबै प्रक्रिया नक्कली थियो। बैंकको भौचर, छाप, मालपोत अधिकृतको दस्तखत पनि नक्कली नै रहेको जनाइएको छ। दैनिक पाँच लिखत पनि पास नभएका बेला १३०४ टोकन नं राखिएको पाइएको छ। उक्त लिखतमा राखिएका साक्षीलाई भने केही थाहा नभएको बताइन्छ।
प्रहरी उपरीक्षक चक्रराज जोशीले सरकारी छाप, दस्तखत किर्ते गरी सर्वसाधारण ठगी गर्ने गिरोहलाई पक्राउ गरी अनुसन्धान सुरु गरिएको बताए। उनका अनुसार पीडितको जाहेरीका आधारमा नक्कली जग्गा बिक्री गर्ने गिरोहमा संलग्न अन्य तथा बिक्री गरिएका जग्गाबारे खोजीकार्य भइरहेको छ। रासस

प्रतिक्रिया दिनुहोस