साहित्यकार सूर्यप्रसाद लाकोजूको कथा संग्रह ‘सत्याग्रह’ सार्वजनिक

चैत २४, काभ्रे। साहित्यकार सूर्यप्रसाद लाकोजूको नवीनतम कथा संग्रह ‘सत्याग्रह’ प्रकाशन भएको छ।

कविता र पनौती नगरको सांस्कृतिक तथा ऐतिहासिक विधामा धेरै कलम चलाएका लाकोजूको यो पहिलो कथासंग्रह हो।

सत्याग्रहमा जम्मा ११ ओटा कथाहरू रहेका छन्। प्राय कथाहरू हुँदा खाने भूईँमान्छेका छन्। उनीहरूको दुख, सङ्घर्ष , पीडा कथा भएर पोखिएका छन्।

त्यस्तै कथाहरूमा माया, प्रेमका सन्दर्भ पनि छन्। सामाजिक संजालको दुरुपयोगका कारण जीवन बर्बाद भएको प्रसङ्ग पनि कथामा छन्। राजनैतिक आस्था र विश्वासका कारण क्रान्तिमा होमिएका सपूतका योगदानको चर्चा पनि कथाहरूमा छन्।

सो कथासङ्ग्रह ट्रान्सवल्ड पब्लिकेशन काठमाडौले प्रकाशन गरेको हो ।

कविता, निबन्ध, हाइकु, नियात्रा, मुक्तक, अनुवाद विधामा कलम चलाउँदै आएका लाकोजूका तीन दर्जन साहित्यि कृतिहरू प्रकाशित छन्।