भदौ ५, काभ्रे। सुरक्षित आप्रवासन परियोजना (सामी) रोशी गाउँपालिकाले आफै सञ्चालन गर्ने भएको छ ।
सिविक फोरम संस्थाको सहजीकरणमा गर्दै आएको परियोजना गाउँपालिका आफैले सञ्चालन गर्ने भएको हो।
मंगलबार सेवाप्रदायक संस्था सिविक फोरमले रोशी गाउँपालिकालाई परियोजनाको कागजात हस्तान्तरण गरेका छन् । सिविक फोरमका प्रतिनिधि वसन्त कुवरले गाउँपालिकाका प्रमुख प्रशासकीय अधिकृत रामबहादुर तामाङलाई परियोजनाको कागजात हस्तान्तरण गर्नुभएको हो। गाउँपालिकाका अध्यक्ष दिनेश लामा, उपाध्यक्ष मिमबहादुर वाईवा(ज्वाला)को उपस्थितीमा हस्तान्तरण गर्नुभएको हो।
नेपाल सरकार र स्वीस सरकारबीच सम्पन्न द्विपक्षीय सम्झौता अन्तर्गत हेल्भेटास–स्वीस इन्टरको अपरेशनसको प्राविधिक सहयोगमा श्रम, रोजगार तथा सामाजिक सुरक्षा मन्त्रालयद्वारा वैदेशिक रोजगारका लागि सुरक्षित आप्रवासन ‘सामि’ परियोजना कार्यान्वयन २०७६ सालदेखि रोशीमा सञ्चालन हुदै आएको थियो ।
सो हस्तान्तरण कार्यक्रममा गाउँपालिकाका अध्यक्ष लामाले सेवा प्रदायक संस्थाले हस्तान्तरण गरेपनि आवश्यक सहयोग हुने छ भन्ने अपेक्षा गरेको बताउनुभयो।
परियोजनाको कागजात र तथ्यांकहरू हस्तान्तरण भएपनि सहयोग गर्नुपर्ने अवस्थामा सँधै सहयोग गर्ने सिविक फोरमका प्रतिनिधि कुवरले बताउनुभयो।
गाउँपालिकाले पहिलो पटक सामी परियोजनाको कार्यक्रम आफैले गर्न लागेकाले फोरमले सहयोग गर्नुपर्ने गाउँपालिकाका प्रमुख प्रशासकीय अधिकृत रामबहादुर तामाङले बताउनुभयो।
परियोजनाले वडा–वडामा कार्यक्रम गर्दै आएका छन् । परियोजनाले बैदेसिक रोजगारीमा रहेका परिवारलाई वित्तिय साक्षरता सम्बन्धी तालिम, मनोसामाजिक परामर्श र बैदेशिक रोजगारीमा जानचाहने युवायुवतीहरूलाई आधारभूत तालि लगायतको काम गर्दै आएका छन् ।
सो कार्यक्रममा सिविक फोरमलाई गाउँपालिकाले मायाँको चिनो प्रदान गरेको थियो ।
प्रतिक्रिया दिनुहोस