ताम्राकारको मिराज कथाङ्ग्रहको अन्तरक्रिया

भदौ २३, काभ्रे। काथाकार ध्रुबकृष्ण ताम्राकारको नवीनतम् कथासङ्ग्रह मिराजको अन्तरक्रिया कार्यक्रम हालै सम्पन्न भएको छ ।

अक्षरमार्गको आयोजनामा भएको सो कार्यक्रममा मिराज कथासङ्ग्रहका बारेमा विभिन्न साहित्यिक व्यक्तित्वहरूले आ–आफ्ना पवचार व्यक्त गरेका थिए ।

कथाकार सूर्यप्रसाद लाकोजूले मिराजमाथि आफ्नो धारण राख्दै भने, ‘ मिराज आम नेपालीको कथा हो । नेपाली समाजमा हुने गरेका घटनाहरूलाई कलात्मक ढङ्गले कथाहरू उनिएका छन् । यस कारण कथाहरू पठनीय छन् । कथा सरल र सरस छन् ।’ अर्का साहित्यकार रामसुन्दर देउजाले मिराजभित्रका कथाहरू यथार्थबादी सामाजिक कथा भएको प्रतिक्रिया दिए ।

पुस्तकको लेखन, पृष्ठभूमि आदिका बारेमा कथाकार ध्रुबकृष्ण ताम्राकारले प्रकाश पारेका थिए । मिराज कथासङ्ग्रहमाथि नेवा पत्रकार राष्ट्रिय दबू काभ्रेका अध्यक्ष सोमकाजी शाक्य, कवि पुरुषोत्तम ताम्राकार लगायतले पाठकीय टिप्पणी गरेका थिए ।

ध्रुबकृष्ण ताम्राकार लामो समयदेखि नेपाली र नेपाल भाषामा कलम चलाउँदै आएका काभ्रेली स्रस्टा हुन् । पनौतीको माटोमा अक्षरको कर्म गर्दै आएका उनले नेपाली साहित्यको कविता, गीत र कथा विधामा कलम चलाउँदै आएका छन् । उनका हालसम्म प्रारम्भ र हृदयका उद्गार कवितासङ्ग्रह, भावनाका उत्सर्गहरू गीतसङ्ग्रह, आँशुको कथा र मिराज कथासङ्ग्रह प्रकाशित छन् ।

त्यस्तै मनको बह र भीडमा म एक्लै नामक गीति अल्वम पनि प्रकाशित छन् ।