धुलिखेल \ बाबुको मृत्युपछि आमा पनि बिवाह गरेर अन्यत्रै गएका ‘टुहुरा’ बालबालिका बस्दै आएको टहरामा आगलागी भएपछि उनीहरुको विचल्ली भएको छ ।
धुलिखेल–१२, सल्लेरीका २३ बर्षीय सुजाता केसी र उनका भाइ १९ बर्षीय सुदिप बस्दै आएको टहरामा पुष २४ गते आगलागी भएको थियो ।
उनीहरुका बाबुुको १८ बर्षअघि निधन भएको थियो । बाबुको मृत्यु भएको ३ बर्षपछि आमा अन्यत्रै गएकी थिइन् ।
हजुरआमाको संरक्षणमा बस्दै आएका उनीहरु हजुरआमाको समेत ३ बर्षअघि मृत्यु भएपछि थप ‘टुहुरा’ भएका छन् ।
आगलागीपछि उनीहरुको टहरा पूर्ण क्षति भएको छ । त्यहाँ रहेको १ बाख्रा जलेर मरेको छ, ४ वटा घाइते छन् ।
आर्थिक अवस्था कमजोर भएका कारण उनीहरुले पढाइ समेत छाडेका छन् ।
उनीहरुको अवस्था बारे जानकारी भएपछि तरुण दल धुलिखेलले खाद्यान सहयोग गरेको छ ।
करिब ४ महिनाको लागि पुग्ने गरी चामल, तेल, नुन, चिउरा, चिनी, चियापत्ती, चाउचाउ, विस्कुट लगायतका खाद्यान सहयोग गरिएको तरुण दल धुलिखेलका सभापति छिरिङ लामाले जानकारी दिए ।
सहयोग लिएर बलराम फार्मेसी धुलिखेलका बलराम थापा, प्रल्हाद मैनाली, तरुण दल धुलिखेलका कोषाध्यक्ष दिपेश रानाभाट, धुलिखेलका युवा नेता दिनेश लामा, अनुप लामिछाने, स्थानीय गौरव भण्डारी पुगेका थिए ।
सभापति लामाले आफूले सञ्चालन गर्दै आएको फायर हब नामक रेष्टुरेन्टमा सुदिपलाई रोजगारी दिने प्रतिवद्धता समेत गरेका छन् ।
प्रतिक्रिया दिनुहोस