पनौती / पनौती क्षेत्रका चर्चित फुटबल खेलाडी लक्ष्मी नारायण खिबञ्जार (लक्ष्य) को स्मृतिमा खुल्ला फुटबल प्रतियोगिता हुने भएको छ ।
मानेश्वरी ब्वाइज क्लव र मानेश्वरी महिला समूहको आयोजना, पनौती नेपाल र विश्राम समाज पनौतीको सहआयोजनामा फाल्गुन ३ गतेबाट प्रतियोगिता हुन लागेको आयोजक मानेश्वरी ब्वाइज क्लवका अध्यक्ष रामकृष्ण श्रेष्ठले जानकारी दिए ।
पनौती क्षेत्रीय रंगशालामा हुने प्रतियोगितामा नेपालका ए र बि डिभिजनक क्लव, विभागीय टिमका साथै छिमेकी जिल्लाका क्लवहरु समेत करिब १५ टिमको सहभागिता रहने सहआयोजक विश्राम समाज पनौतीका अध्यक्ष ओमकृष्ण श्रेष्ठले जानकारी दिए ।
प्रतियोगितामा प्रथम हुने टिमले नगद २ लाख रुपैयाँ र दोस्रो हुने टिमले १ लाख रुपैयाँ पाउनेछन् । प्रतियोगिता अवधीभरको उत्कृष्ट खेलाडी, उच्च गोलकर्ता, गोलरक्षक, प्रतिरक्षक, खेल अवधीभरको उत्कृष्ट खेलाडीका साथै अनुशासित क्लवले पनि नगद पुरस्कार प्राप्त गर्नेछन् ।
पनौतीमा विभिन्न समयमा विविध विधामा फुटबल प्रतियोगिताहरु आयोजना गर्दै आइरहेको क्लवले सामाजिक कृयाकलापहरु समेत गर्दै आएको छ ।
पनौती क्षेत्रमा फुटबल खेलमा ख्याती कमाएका लक्ष्मीनारायणको २०८० फाल्गुन ६ गते निधन भएको थियो । मानेश्वरी व्वाइज क्लवको तत्कालिन अध्यक्ष रहेका लक्ष्मीनारायण काभ्रे जिल्ला फुटबल संघको २ कार्यकाल सचिव भएर काम गरेका थिए ।
विभिन्न तहका प्रतियोगितामा खेलेका उनलाई नयाँ खेलाडी उत्पादन तथा प्रवद्र्धन गरेको भन्दै जिल्ला खेलकुद महोत्सव २०८० मा सम्मानित गरिएको थियो । फुटबल खेल र खेल प्रवद्र्धनमा योगदान दिएको भन्दै पनौती नगरपालिकाले पनि उनलाई सम्मान गरेको छ ।
शुक्रवार पनौतीमा आयोजित पत्रकार सम्मेलनमा नेपाल पत्रकार महासंघ काभ्रेका शाखाका अध्यक्ष विनोदकुमार न्यौपाने, पनौती वडा नं ७ का अध्यक्ष सविन ताम्राकार, पनौती समाजका अध्यक्ष निवास श्रेष्ठ लगायतले खेलकुद क्षेत्रमा लक्ष्मीनारायणको योगदानको चर्चा गर्दै उनको स्मृतीमा गरिएको प्रतियोगिता सफलताको कामना गरे ।
प्रतिक्रिया दिनुहोस