धुलिखेल / अस्पताल नेतृत्व तथा व्यवस्थापन सम्बन्धी राष्ट्रिय सम्मेलन धुलिखेल अस्पतालमा आयोजना गरिएको छ ।
धुलिखेल अस्पतालमा पहिलो पटक आयोजना गरिएको सम्मेलनमा देशभरका विभिन्न अस्पतालका चिकित्सक, स्वास्थ्यकर्मीका साथै अस्पताल व्यवस्थापनमा कृयाशिल व्यक्तित्व सहभागी थिए ।
कार्यक्रममा काठमाण्डौ इन्स्टिच्युट अफ चाइल्ड हेल्थका संस्थापक तथा अध्यक्ष रहेका वरिष्ठ मुटुरोग विशेषज्ञ डा. भगवान कोइरालाले अस्पतालहरूलाई उपचार केन्द्रबाट जनस्वास्थ्यका संवाहकमा रूपान्तरण गर्ने सम्बन्धमा र फोन्टाना मेडिकल सेन्टरका पेडियाट्रिक क्रिटिकल केयर निर्देशक डा. मुदित माथुरले स्वास्थ्य सेवाको गुणस्तर सुधार र बिरामी सुरक्षा विषयमा विशेष सम्बोधन गरेका थिए ।
कार्यक्रमा त्रिभुवन विश्वविद्यालय शिक्षण अस्पतालका कार्यकारी निर्देशक डा. सुवास आचार्यले स्वास्थ्य सेवाको गुणस्तर, बिरामी सुरक्षा, र क्लिनिकल अभ्यास, तिलगंगा आँखा प्रतिष्ठानका प्रमुख कार्यकारी अधिकृत डा. रीता गुरुङले अस्पताल सञ्चालन, दक्षता र दिगोपना, उपेन्द्र देवकोटा मेमोरियल नेशनल इन्स्टिच्युट अफ न्यूरोलोजिकल एन्ड एलाइड साइन्सेज, बाँसबारीका प्रमुख कार्यकारी अधिकृत मिलन गुरुङले गुणस्तर, बिरामी सुरक्षा, र अस्पतालको कार्यसम्पादन, नेपाल हेल्थकेयर म्यानेजर्स एसोसिएसनका अध्यक्ष समेत रहेका सुवेक्षा इन्टरनेशनल अस्पताल प्रमुख कार्यकारी अधिकृत डा. होम प्रसाद अधिकारीले स्वास्थ्य सेवा नेतृत्व र जनशक्ति विकास, विराट मेडिकल कलेज तथा शिक्षण अस्पतालका प्रमुख कार्यकारी अधिकृत डा. डेनिस कार्कीले सुधार परियोजनाहरूमा बिजनेस केस स्टडीज र धुलिखेल अस्पतालका वरिष्ठ मुटुरोग विशेषज्ञ डा. राजेन्द्र कोजूले मर्निङ सिन्थेसिस र आफ्टरनुन ब्रिफिङबारे अनुभवसहितको कार्यपत्र प्रस्तुत गरे ।
सम्मेलनकै दौरान समानान्तर रुपमा विभिन्न कार्यशाला सञ्चालन गरिएका थिए । किष्ट अस्पतालका महाप्रबन्धक साजन राज भण्डारीले स्वास्थ्य सेवा गुणस्तर, बिरामी सुरक्षा र क्लिनिकल उत्कृष्टता, त्रिशूली अस्पताल, नुवाकोटका अस्पताल निर्देशक डा. राजेन्द्र लामाले नवप्रवर्तन, डिजिटल स्वास्थ्य, र भविष्यको हेरचाह मोडेलहरु र नेशनल ओपन कलेजका सह–प्राध्यापक महेश मास्केले स्वास्थ्य सेवा, नेतृत्व र जनशक्ति विकासबारे कार्यपत्र प्रस्तुुत गरे । आत्मिय अस्पतालका कार्यकारी निर्देशक सन्जीव केसीले सामुदायिक संलग्नता र जनस्वास्थ्य, रसुवा अस्पतालका जनरल प्राक्टिस एन्ड इमर्जेन्सी मेडिसिन डा. सुनील कुमार दासले अस्पताल सञ्चालन, प्रभावकारीता र दिगोपना र न्याय हेल्थका कार्यक्रम तथा साझेदारी निर्देशक सिर्जना सापकोटाले साझेदारी, अनुसन्धान र स्वास्थ्य प्रणाली सहकार्यबारे कार्यपत्र प्रस्तुत गरे ।
कार्यक्रमा सहभागीहरुले आगामी दिनमा अस्पतालहरुको सहकार्यबारे चर्चा गर्दै विभिन्न कार्ययोजना प्रस्ताव गरेका छन् ।
कार्यक्रममा स्वास्थ्य सेवा विभागका महानिर्देशक डा. अनुज भट्टचनले स्वास्थ्य सेवाको क्षेत्रमा गर्नुपर्ने सुधारका लागि सम्मेलन उपयोगी हुने विश्वास व्यक्त गरे । धुलिखेल अस्पतालका संस्थापक तथा कार्यकारी निर्देशक डा. राम कण्ठ माकजू श्रेष्ठ, मेडिकल निर्देशक डा. बलराम मल्ल, प्रशासकीय निर्देशक डा. विराजमान कर्माचार्यलगायतले अस्पतालहरुविच सहकार्य र यसको प्रभावकारीबारे चर्चा गरेका थिए ।
प्रतिक्रिया दिनुहोस