राजभाइ प्रधानको सहयोगले शीर मेमोरियल अस्पतालमा बन्यो ओपिडीको नयाँ भवन

बनेपा /  शिर मेमोरियल एडभेन्टिष्ट अस्पतालको बहिरंग विभागको नयाँ भवन तयार भएको छ ।

बनेपाका ८१ वर्षीय राजभाई प्रधानको व्यक्तिगत खर्चमा २८ हजार वर्गफिटमा बनेको ४ तले बहिरंग विभागको भवन २०८१ कार्तिक २१ गते निर्माण थालिएको थियो । अहिले बहिरंग र अन्तरंग सेवाको लागि कोठा अभाव हुँदा सेवा विस्तार हुन कठिनाई हुँदै आएको थियो । सुरुमा २ तलाको निर्माण थालिएको भएपनि प्रधानले अस्पतालको लागि अपर्याप्त हुने देखेपछि थप २ तला निर्माणको लागि सहयोग थप गरेका थिए ।

१० बर्षअघि भवन निर्माणको कुरा अघि बढाएका प्रधानले नक्सा निर्माण, नक्सा पास लगायतका कामले केही ढिला भएपनि आफू जन्मिएको स्थानमा केही गर्न पाएकोमा खुशी व्यक्त गर्दछन् । आफू कुनै उद्योगपति, धनाढ्य नभएपनि जन्मेपछि समाजलाई केही योगदान दिनुपर्छ भनेर अस्पतालको सेवा विस्तारको लागि भवन निर्माणलाई सहयोग गरेको बताए । दान भएकोले प्रधानले निर्माण लागत सार्वजनिक गर्न चाहेका छैनन्।

बनेपा स्थायी घर भएका प्रधान हाल ललितपुरको बागडोल बस्दै आएका छन् । शिक्षा, स्वास्थ्य क्षेत्रको लागि सहयोग गर्दै आएका प्रधानले पाटन स्वास्थ्य विज्ञान प्रतिष्ठान (पाटन अस्पताल), कोटेश्वर, कुलेश्वर लगायतका क्षेत्रमा सामाजिक कार्य गर्दै आएका छन् ।

हस्तान्तरण कार्यक्रममा बनेपा नगरपालिका प्रमुख शान्तीरत्न शाक्य, नेपाल पत्रकार महासंघ काभ्रेपलाञ्चोकका अध्यक्ष विनोदकुमार न्यौपाने, वडा नं ५ का अध्यक्ष बलराम अधिकारी, वरिष्ठ साहित्यकार मोहन दुवाल, मानवअधिकार अभियन्ता राजु सरकार, अस्पतालका तर्फबाट डा. ताराजङ्ग गुरुङलगायतले प्रधानको सहयोगी भावनाको प्रशंसा गर्र्दै बनेपा, काभ्रे र अन्य जिल्ला समेतका सेवाग्राही लाभान्वित हुने तर्क गरेका थिए ।