सानिमा लाइफको आइपीओमा लगानीकर्ताको ओइरो, पहिलो दिन नै माग भन्दा २.२२ गुणा बढी आवेदन

साउन २०, काठमाडौं। सानिमा लाईफ इन्स्योरेन्सको आइपीओमा माग भन्दा २.२२ गुणा बढी आवेदन परेको छ ।

कम्पनीले ६० लाख कित्ता मध्ये सामुहिक लगानी कोषलाई ५ प्रतिशत तथा कर्मचारीलाई ५ प्रतिशत छुट्याई बाँकी रहेको ५४ लाख कित्ता शेयर सर्वसाधारणलाई निष्काशन गरिएको थियो ।

त्यसमा ७ लाख २८ हजार ८ सय ४० जना सर्वसाधारण लगानीकर्ताले १ अर्ब २० करोड १८ लाख २६ हजार रकमको १ करोड २० लाख १८ हजार २ सय ६० कित्ता शेयरको लागि आवेदन परेको छ ।

आइपिओमा निष्काशनको पहिलो दिन ५ बजेसम्मको तथ्यांकमा शेयर आवेदन गर्ने आवेदकको संख्या हालसम्मकै सबैभन्दा बढि रहेको छ । यसको बिक्री प्रबन्धकमा प्रभु क्यापिटल रहेको छ ।

लगानीकर्ताले न्यूनतम १० कित्तादेखि अधिकतम ३० हजार कित्तासम्म आवेदन दिन पाउने व्यवस्था रहेको छ ।

यो आइपिओमा साउन २४ गते गतेसम्म आवेदन दिन सकिने छ । लगानीकर्ताले सि आस्वा सदस्य रहेका बैंक तथा वित्तीय संस्था र मेरो सेयरबाट पनि आवेदन दिन सकिने छ ।