वैशाख २२, काभ्रे। जिल्ला विपद् व्यवस्थापन समिति काभ्रेले भोलीे शनिबार दोलालघाटमा विपद् प्रतिकार्य संयुक्त अभ्यास गर्ने भएको छ । संयुक्त अभ्यासलाई मनसुन ३ अभ्यास नामाकरण गरिएको छ ।
मनसुन तथा अन्य विपद्का घटनामा खोज तथा उद्धार तथा विपद् प्रतिकार्यका लागि अपनाउनु पर्ने पूर्व तयारीमा संयुक्त अभ्यास “मनसुन ३“ को लागि काभ्रे जिल्ला भूम्लू गा.पा वडा ८ दोलालघाट स्थित सुनकोशीको पुल आसपासका ईलाकाहरूमा श्री कालीजंग गणको नेतृत्वमा पूर्व अभ्यास गरिएको छ ।
श्री कालीजंग गणका सेनानी निरञ्जन खड्काको कमाण्डमा नेपाली प्रहरी, सशस्त्र प्रहरी, नेपाल रेडक्रस सोसाईटी काभ्रे, जनप्रतिनिधि तथा स्थानिय ब्यक्तिहरूको सहभागितामा पूर्व अभ्यास संचालन भएको छ ।
दोलालघाटमा हुने मनसुन ३ संयुक्त अभ्यासले जिल्ला स्तरमा उपलब्ध क्षमता (पूर्व तयारी र प्रतिकार्य) को लेखाजोखा, मानवीय सहायतामा संलग्न निकायहरुको पहिचान, प्रतिकार्यको साझा मापदण्ड तयार र खोज तथा उद्धार टोलीको क्षमता अभिवृद्धि गर्ने श्री कालीजंग गणका गणपति कर्णेल प्रकाशबहादुर सिंहले जानकारी दिनुभयो । संयुक्त अभ्यासमा बगेको र डुबेको, पहिरोमा फसेको व्यक्तिको उद्धार गरिनेछ ।
काभ्रेमा चालु वर्षको ९ महिनामा पहिरोमा परेका ३, आगलागीमा परेका २५, चट्याङ्गमा परेका ४, हावाहुरीमा परेका १ र करेन्टका कारण विपदमा परेका एक जनाको उद्धार गरिएको छ । विपद्का कारण ३ सय ७७ जना घाइते भएका छन् भने ५९ जनाको मृत्यु भएको छ । ४ सय २४ वटा घटना भएको तथ्ग्याङ्कमा उल्लेख छ । अघिल्लो आर्थिक वर्षमा विपदमा परी ३ सय ५० जना घाइते भएका थिए भने ५६ जनाको मृत्यु भएको थियो । ४ सय ४३ वटा घटना भएका थिए । खोज तथा उद्धार तथा विपद अभ्यासमा १३ वटै स्थानीय तहको प्रतिनिधित्व हुने छ ।
प्रतिक्रिया दिनुहोस