काठमाडौं / कतार एयरवेजको जागिर छाडेर गाउँ फर्किएर कृषि र ग्रामीण पर्यटनमा सक्रिय नमोबुद्ध नगरपालिका वडा नं १० का अनुप पाठकलाई रोटरी क्लब अफ काठमाडौं हाइटले ‘उदयमान उद्यमी सम्मान २०२६’ प्रदान गरेको छ ।
रोटरी क्लब अफ काठमाडौं हाइटको सातौं चार्टर डे तथा पदस्थापन समारोहमा पाठकलाई ‘इमर्जिङ इन्टरप्रेन्योर अवार्ड’ प्रदान गरिएको हो ।
युवा तथा उदीयमान उद्यमीलाई उनीहरूको नवीन सोच, सिर्जनशीलता, व्यावसायिक पहल र समुदायमा पारिरहेको प्रभावका आधारमा पहिचान तथा प्रोत्साहन गर्ने उद्देश्यले पुरस्कार स्थापना गरिएको क्लबले जनाएको छ । २५ हजार नगदसहित रोटरी इन्टरनेशनल डिस्ट्रिक ३२९२ का डिस्ट्रिक गर्भनर विष्णुबहादुर कार्कीले उनलाई सम्मान गरेका हुन् ।
पाठकले करिब पाँच वर्षअघि कतार एयरवेजको आकर्षक रोजगारी छाडेर आफ्नै गाउँमा उपलब्ध कृषि, प्रकृति, संस्कृति र स्थानीय स्रोतलाई पर्यटनसँग जोडेर बसेरी फार्मस्टे एण्ड रिट्रिट सञ्चालन गरिरहेका छन् । फार्मस्टेले स्थानीय उत्पादनको बजार विस्तार, रोजगारी सिर्जना, स्थानीय संस्कृति संरक्षण र ग्रामीण अर्थतन्त्रलाई चलायमान बनाउने उद्देश्यसहित काम गरिरहेको छ ।
सम्मान ग्रहण गर्दै पाठकले सम्मानलाई व्यक्तिगत उपलब्धिभन्दा परिवार, गाउँ, स्थानीय समुदाय। बसेरी फार्मस्टे परिवार, साथीभाइ तथा शुभेच्छुकहरूको साझा सम्मानका रूपमा लिएको बताए । ‘विदेशमा राम्रो करिअर थियो। तर मेरो मन आफ्नै गाउँ र आफ्नै माटोमै थियो। नेपालमै केही गर्न सकिन्छ भन्ने विश्वासका साथ फर्किएको थिएँ। आजको सम्मानले खुसीभन्दा बढी जिम्मेवारी थपिदिएको छ ।’ उनले भने ।
प्रतिक्रिया दिनुहोस