काठमाडौं / परराष्ट्रमन्त्री आरजु राणा देउवाले गत असोज १० देखि १२ गतेसम्मको अबिरल बर्षापछिको बाढी र पहिरोले क्षतिग्रस्त बी.पी. राजमार्ग पुनर्निर्माण गरिदिन जापानी विदेश राज्यमन्त्री मियाजी ताकुमामार्फत जापान सरकारलाई आग्रह गरेकी छन् ।
सोमबार शिष्टाचार भेटवार्ताका क्रममा मन्त्री राणाले पुनर्निर्माणका क्षेत्रमा सहयोग गरिदिन आग्रह गरेकी हुन । प्रधानमन्त्री केपी शर्मा ओलीले पनि नेपालका लागि जापानी राजदूतमार्फत आग्रह गरेको स्मरण पनि मन्त्री राणाले गराएकी थिइन् ।
आठौं हिन्द महासागर सम्मेलनमा सहभागिताका लागि ओमनको राजधानी मस्कटमा रहेका परराष्ट्रमन्त्री राणा र जापानी राज्यमन्त्री ताकुमाबीच सोमबार भेटवार्ता भएको थियो । भेटका क्रममा नेपाल जापान सम्बन्धका विविध पक्षहरूका साथै दुई देशबीचको आपसी सम्बन्ध र साझा चासोका विषयमा कुराकानी भएको थियो ।
गत असोजको बाढी र पहिरोका कारण क्षतिग्रस्त राजमार्गका विभिन्न स्थानमा डाइभर्सन बनाएर अस्थायी रुपमा यातायात सञ्चालन भइरहेको छ ।
प्रतिक्रिया दिनुहोस