काभ्रेको पनौतीमा अनिश्चिकालिन कर्फ्यु, आजको वार्षिक परिक्षा पनि स्थगित

चैत ४, काभ्रे । जिल्ला प्रशासन कार्यालय काभ्रेले पनौतीमा अनिश्चितकालिन कर्फ्यु जारी गरेको छ । आज (मंगलबार) ९ बजेदेखि अर्को सुचना जारी नहुदाँसम्मका लागि कर्फ्यु जारी गरिएको जिल्ला प्रहरी कार्यालय काभ्रेका प्रहरी नायब उपरीक्षक कुमार विक्रम थापाले जानकारी दिए ।

अनिश्चितकालिन कर्फ्यु कारण पनौती नगरपालिका क्षेत्रका बिद्यालयमा आजको वार्षिक परिक्षा पनि स्थगित भएको छ । पनौती क्षेत्रका विद्यालयहरु पनि आज ठप्प भएका छन् ।

हिजो (सोमबार) दिउँसो पनौती-५ बसपार्क छेउको पुल नजिकै बा ५ ख ५४८० नम्बरको ट्रिपरको ठक्करबाट खानीखोला गाउँपालिका वडा नम्बर १ स्थित श्री कालिका प्राथमिक विद्यालय हातिडाँडाका प्रधानाध्यापक ३३ बर्षीय जुनिमाया गोले र उनकी ३ बर्षिया छोरी स्मारिकाको निधन भएको थियो ।

घटनापछि स्थानीयले पनौती बसपार्क क्षेत्रमा प्रर्दशन गरेका थिए । प्रर्दशनका क्रममा ६ जना प्रहरी र दुई जना प्रर्दशनकारी घाइते भएका थिए । प्रहरीले स्थिति नियन्त्रणमा लिन १५ राउन्ड हवाइ फाएर र १७ राउन्ड अश्रु ग्यास प्रहार गरेको थियो ।

प्रर्दशनकारीले पनौतिमा रहेको प्रहरी बिट तोडफोड गरेका छन् । घाइते हुनेमा प्रहरीका सई बिरेन्द्र शाह, हवल्दार मिन बहादुर थापा, दिलिप बुढाथोकी र सुनिता घिमिरे, प्रहरी जवान नवराज भारती र ललित थापा मगर रहेको जिल्ला प्रहरी कार्यालय काभ्रेका प्रहरी नायब निरीक्षक कुमार विक्रम थापाले जानकारी दिए ।

प्रर्दशनकारी तर्फ सञ्जय चौधरी, हर्क बहादुर ग्याबा, जीव राज तामाङ र सरत तामाङ घाइते भएका छन् । घाइते सबै बनेपा स्थित शीर मेमोरियल अस्पतालमा उपचार भइरहेको छ ।