भारतमा निर्भया सामूहिक बलात्कारमा संलग्न चारै जनालाई मृत्युदण्ड

चैत ७, नयाँ दिल्ली। निर्भया बलात्कारका दोषीलाई आज सुर्योदय अगावै फाँसी दिइएको छ । भारतीय समय अनुसार विहान साँढे पाँच बजे चारै जना दोषीलाई दिल्लीस्थित तिहार जेलमा फाँसी दिइएको हो ।

फाँसी दिइएकामा मुकेश सिंह ३२ वर्ष, अक्षय ठाकुर ३१ वर्ष, पवन गुप्ता २५ वर्ष र विनय शर्मा २६ वर्षका छन् । फाँसी पवन जल्लादले लिभर तानेर दिएका थिए । उनी मंगलबार नै उत्तर प्रदेशको मेरटबाट तिहार जेल पुगेका थिए ।

तिहार जेलमा पहिलोपटक एकैपटक चारजनालाई फाँसी दिइएको हो । टाइम्स अफ इन्डियाका अनुसार पवन जल्लादले फाँसीको पूर्वाभ्यास गरिसकेका थिए । जेलका सुपरिटेन्डेन्टले झुण्ड्याउने डोरीको परीक्षण गरी झुण्ड्याउने फाँसीको तख्ताको समेत नीरिक्षण गरेका थिए ।

दिल्ली जेल ऐन २०१८ अनुसार फाँसी दिइँदा जेल सुपरिटेन्डेन्ट, डेपुटी सुपरिटेन्डेन्ट, मेडिकल अफिसर, डिस्ट्रिक मेजिस्ट्रेटको उपस्थिति थियो । गार्ड, वार्डर सहित हतियारधारी गार्ड समेत उपस्थित थियो ।

फाँसी दिइएका चारैजनाका परिवार भने उपस्थित थिएनन् । तिहार जेलका सबै कैदीबन्दी जेल परिसरभित्रको कोठा बाहिर समेत आउन दिइएको थिएन । उनीहरुलाई यसै हप्ताभित्र परिवारसँग भेट्न दिइएको थियो ।