धुलिखेल काभ्रेकै पहिलोे बालमैत्री नगरपालिका घोषणा

फागुन ५, काभ्रे । काभ्रे जिल्लाको धुलिखेल नगरपालिकालाई जिल्लाकै पहिलो बालमैत्री नगरपालिका घोषणा गरिएको छ । धुलिखेल नेपालको छैठौँ, वागमती प्रदेशको तेस्रो र जिल्लाको पहिलो बालमैत्री नगरपालिका बन्न सफल भएको हो ।

नगरपालिकाको ३५ औँ स्थापना दिवसको अवसर पारेर आज नगरपालिकालाई बालमैत्री नगरपालिका घोषणा गरिएको हो । कार्यक्रमका प्रमुख अतिथि परराष्ट्र मन्त्री प्रदिपकुमार ज्ञवालीले नगरपालिकालाई बालमैत्री नगरपालिका घोषणा निर्णय पत्र पढेर सुनाउनु भएको थियो ।

उहाँका अनुसार बालमैत्री नगरपालिका नाममा मात्र सिमित नगर्नको लागि नगरपालिकाले विभिन्न रणनितिक योजना पनि बनाएको छ ।

बालमैत्री नगरपालिका बनाउनको लागि नगरपालिकालाई विभिन्न संघसंस्थाहरुले पनि सहयोग गरेको थियो । नगरपालिकालाई बालमैत्री बनाउन पछिल्लो समय बालमैत्री स्थानीय शासन अन्तर्गतका ३९ सुचक मापन कार्यलाई तिव्रता दिइएको थियो ।

नगरपालिकाले बाल अधिकार सुनिश्चितताको लागि सबै वडामा बाल मैत्री संरचना र उद्यान निर्माण गरेको छ । नगरपालिकालाई बालमैत्री बनाउन सुरु गरिएको ४ बर्ष पछि मात्र सफल भइएको नगरपालिकाका सामाजिक विकास अधिकृत विदुर गौतम बताउनुहुन्छ ।

स्थापना दिवसमा विभिन्न व्यक्तिलाई सम्मान

धुलिखेल नगरपालिकाले आफ्नो ३५ औँ स्थापना दिवसको अवसरमा विभिन्न व्यक्ति तथा संस्थालाई सम्मान गरेको छ । नगरपालिकाले दश व्यक्ति र एक संस्थालाई सम्मान गरेको हो । नगरपालिकाले जीवनको अधिकाँश समय धुलिखेल नगरको स्वास्थ्य क्षेत्रमा विशिष्ट योगदान पु¥याएको भन्दै धुलिखेल रत्नबाट डा.राजेन्द्र कोँजुलाई सम्मान गरिएको छ ।

यसैगरी धुलिखेल नक्षत्रबाट बद्रीबहादुर राई, धुलिखेल प्रज्ञाश्रीबाट भुवन चौलागाँई, धुलिखेल सेवाश्रीबाट नेपाल सरकारका सचिव गोपिनाथ मैनालीलाई दोसल्ला, सम्मानपत्र ओढाएर परराष्ट्र मन्त्री प्रदिपकुमार ज्ञवालीले सम्मान गर्नुभएको हो ।

यसैगरी कार्यक्रममा धुलिखेल नगरको विभिन्न क्षेत्रमा योगदान पु¥याएको भन्दै धुलिखेल ताराबाट नगरपालिकाका पूर्व प्रमुख प्रशासकिय अधिकृत तारानाथ लुईटेल, शिक्षासेवी वेदप्रसाद कोँजु, सेभ द चिल्ड्रेन, सरोज प्याकुरेल, होटल सङ्घ काभ्रेकी सचिव ज्योत्सना सैँजुलाई सम्मान गरिएको छ ।

त्यसैगरी सेवाग्राहीहरुसँगको सम्बन्ध, इमान्दारिता, पेशागत निष्ठा, आचरण राम्रो भएको भन्दै नगरपाकिलाको स्वास्थ्य शाखामा कार्यरत सिअहेव शरदचन्द्र थापा र नगरपालिकाका सामाजिक विकास अधिकृत बिदुर गौतमलाई सम्मान गरिएको हो ।