होक्से – प्रधानमन्त्री पुष्पकमल दाहालले पाँचखाल नगरपालिका वडा नं ७ मा बन्ने महिला उद्यमी हरित औद्योगिक पार्क शिलान्यास गरेका छन् ।
दक्षिण एसियाली महिला विकास मञ्चको अग्रसरतामा उद्योग, वाणिज्य तथा आपूर्ति मन्त्रालय र पाँचखाल नगरपालिकासँगको सहकार्यमा ग्राम निर्माण हुन लागेको हो ।
पाँचखाल नगरपालिकाले वडा नं ७ (साविक होक्से गाविस)मा ग्राम निर्माणको लागि कित्ता नम्बर ८९, ९० र ११३ को करिब ५ हेक्टर (९८ रोपनी) जग्गा २५ वर्षका लागि उपलब्ध गराउने गरी नगर प्रमुख महेश खरेल, दक्षिण एसियाली महिला विकास मञ्चका अध्यक्ष प्रमिला आचार्य रिजाल र महिला उद्यमी महासंघ, नेपालका अध्यक्ष शारदा रिजालबीच त्रिपक्षीय सम्झौता भएको थियो ।
मञ्चका अध्यक्ष प्रमिला आचार्य रिजालका अनुसार, पार्कभित्र ५० वटा लघु, मझौला र साना उद्योग स्थापना हुनेछन् । स्थानीय कच्चा पदार्थलाई प्राथमिकता दिएर उद्योगमा प्रयोग गरिने उनले बताइन् । पार्कभित्र प्रशिक्षण केन्द्र, गोदाम, कोल्ड स्टोरेजका साथै कृषि उत्पादनको प्याकेजिङ, प्रशोधन, सुकाउने र ग्रेडिङसँग सम्बन्धित कार्य हुनेछन् ।
पार्क शिलान्यास गर्दै प्रधानमन्त्री पुष्पकमल दाहालले मुलुकमा विभिन्न स्वरुपमा हरित क्रान्ति सुरुवात हुदै गरेको भन्दै पाँचखालमा निर्माण हुन लागेको हरित पार्क सफल बनाउन सरकार लाग्ने बताए ।
अर्थमन्त्री प्रकाशशरण महतले पाँचखालमा निर्माण थालिएको महिला उद्यमी हरित औद्योगिक पार्कलाई आगामी बजेटमा कुनै रुपमा सम्बोधन गर्ने प्रतिवद्धता जनाउँदै ७ वटै प्रदेशमा स्थापना गर्ने तयारीका साथ सरकार अघि बढेको बताए ।
पाँचखाल नगर प्रमुख महेश खरेलले स्थानीय उत्पादनलाई मुल्य थप गर्नको लागि उद्योग फलदायी हुने विश्वास गर्दै १ अर्ब निर्यात गर्ने लक्ष्य लिए ।
महिला उद्यमी हरित औद्योगिक पार्क समितिका सभापति शारदा रिजालले सबैको सहयोगमा पार्क निर्माण छिटो गर्नुपर्ने बताइन् ।
प्रतिक्रिया दिनुहोस